UDa Cruz nombandela ngezicoco kwiChiefs
Umqeqeshi we-Kaizer Chiefs uFernando Da Cruz useqinisekise abalandeli ukuthi inhloso yeqembu ukuwina izicoco kule sizini.
Kodwa uthi lokho kuzofezeka ngombandela, hhayi ngokushesha okufiswa abalandeli.
Ekhuluma ngaphambi komdlalo wokuvula isizini yeBetway Premiership neKruger United ngoMgqibelo, uDa Cruz uthe okokuqala kufanele iChiefs iqale kahle iligi.
“Inhloso yethu vele ukuwina izicoco,” kusho uDa Cruz.
“Siyiqembu elikhulu elinomlando omkhulu, abalandeli abaningi nezifiso ezinkulu.
“Kodwa isinyathelo sokuqala ukuqala kahle iligi. Ngemuva kwalokho sizohamba kancane kancane silwele izicoco.”
La mazwi afika ngemuva kokuthi esanda kuvuma ukuthi isikwati sakhe asikakakulungeli ukuncintisana ne-Orlando Pirates neMamelodi Sundowns ngesicoco seligi.
Nokho, uthe lokho kungashintsha uma iqembu lingamtholela abanye abadlali abahlaselayo.
I-Kaizer Chiefs isaqhubeka nokuxoxisana neStellenbosch FC ngomdlali wasophikweni uLangelihle Phili.
- FUNDA NALA | Izintwana zithathe izinombolo zezingqwele kwiBucs
UFernando Da Cruz uthi ufuna abadlali abakwazi ukudlala ezindaweni eziningi enkundleni ngoba yilolo hlobo lwabadlali oludingekayo ebholeni lesimanje.
Uma uPhili esayina, kulindeleke ukuthi ahambisane kahle nendlela uFernando Da Cruz afuna i-Kaizer Chiefs idlale ngayo.
- EZISHISAYO| Cofa lapha usithole kuWhatsApp
