Owe-Arrows nowePirates badle izindondo zeBetway Premiership
Sekuvele izindaba ezizonyusa ukuzethemba ngaphambi komdlalo obhekwe ngabomvu weBetway Premiership phakathi kweGolden Arrows ne-Orlando Pirates.
Isihlabani seGolden Arrows, uSiyanda Ndlovu nomqeqeshi we-Orlando Pirates, u-Abdeslam Ouaddou, baklonyeliswe ngezindondo zeBetway Premiership zenyanga kaSepthemba/Okthoba.
Lokhu kuphawula ukuhlonishwa okokuqala ngqa kwalaba bobabili kwiligi enkulu yaseNingizimu Afrika.
Abawinile bakhethwe yithimba elizimele lezintatheli nabasakazi abagunyazwe yi-PSL.
U-Ouaddou wenza umthelela osheshayo
U-Ouaddou uthole umklomelo woMqeqeshi weNyanga ngemuva kokuhola i-Orlando Pirates ekwenzeni kahle — inqobe imidlalo emithathu ngaphandle kokungenelwa yigoli.
Uhlaka loludlala lwalo mqeqeshi oluhlanganisa ukuhlasela ngamandla, nokuvala thaqa emuva lubuyisele iPirates embangweni wesicoco seligi.
UNdlovu uvike ngezimbili
USiyanda Ndlovu uqhubekile nomgqigqo wakhe omuhle kwisizini yakhe yokuqala esigabeni esiphezulu — ewina indondo yoMdlali weNyanga neyeGoli leNyanga.
Lo mdlali oneminyaka engu-23 ubudala ube nesandla ekuvukeni kabusha kweGolden Arrows, wanikela ngamagoli amathathu waphinde wakhela ozakwabo amathathu emidlalweni emihlanu.
FUNDA NALA | UKaze ukhuza ihaba kwiChiefs
Igoli lakhe elimangalisayo alishaya bebhekene neStellenbosch FC ngoSepthemba 22, ejika ngobunono izitobha qede adedele elihle ishodi yilo elimtholele indondo yeGoli leNyanga.
Le ndondo kade eyibanga noJaisen Clifford weMarumo Gallants noThabang Mathuludi wePolokwane City.
- Player of the Month: Siyanda Ndlovu (Golden Arrows)
- Coach of the Month: Abdeslam Ouaddou (Orlando Pirates)
- Goal of the Month: Siyanda Ndlovu (Golden Arrows)
ZITHOLE ZISHISA: Cofa lapha usithole kwiWhatsApp Channel yethu
