Owe-ANC ‘ucikwe’ uMokoena ufuna ahlawuliswe

UNobhala-Jikelele we-ANC, uFikile Mbalula, usecele iSouth African Football Association (Safa) ukuthi ithathele izinyathelo umdlali weBafana Bafana, u-Teboho Mokoena.

Lokhu kuza ngemuva kwamazwi alo mdali ngesikhathi iqembu lamukelwa e-OR Tambo International Airport ngesonto elidlule.

UMokoena, ongumdlali weMamelodi Sundowns, wabonga ngokukhethekile abalandeli be-Economic Freedom Fighters (EFF) ngesikhathi iBafana Bafana ibuya kwiNdebe yoMhlaba.

UMbalula ubhale ku-X eveza ukungajabuli kwakhe, ethi ijezi leBafana Bafana akufanele lisetshenziselwe ukukhuthaza noma yiliphi iqembu lezepolitiki.

“Ngiphoxekile ngoMokoena neSafa. Kumele ajeziswe. Akumele kusetshenziswe ijezi lesizwe ukukhuthaza i-EFF. 

“Lokho kumele akwenziwe ngesikhathi sakhe siqu,” kubhala uMbalula.

Uqhubeke wathi lokhu bekuyisenzo esihlelwe kusengaphambili futhi ngamabomu.

Uveze ukuthi u-Teboho Mokoena akazange enze okufanayo ngesikhathi iMamelodi Sundowns iwina iCaf Champions League.

Ngakolunye uhlangothi, umkhulumeli we-EFF uSinawo Thambo uvikele uMokoena, wasola uMbalula ngokungenela kwezemidlalo ngenxa yezepolitiki. 

Uthe lo mdlali akufanele asatshiswe. UNgqongqoshe wezeMidlalo, uGayton McKenzie, naye usephawule ngalolu daba.

• FUNDA NALA | AwaseTanzania afuna okhonjwa kwiChiefs

Uzwakale engahambisani nesenzi sika-Teboho Mokoena, egcizelela ukuthi ipolitiki akumele ixutshwe nemisebenzi yeqembu lesizwe.

Kuze kube manje, iSafa ayikakhiphi sitatimende mayelana nesicelo sikaMbalula sokuthi uMokoena athathelwe izinyathelo.

• EZISHISAYO| Cofa lapha usithole kuWhatsApp