AwaseTanzania ‘abangisa’ iChiefs kuMakgalwa

Kubikwa ukuthi amaqembu amakhulu aseTanzania asembangweni oshisayo wokusayinisa umdlali wasophondweni weSekhukhune United, u-Keletso Makgalwa.

Ngokombiko weFARPost, iSimba SC neYoung Africans bafuna ukuqinisa izikwati zabo ngaphambi kwesizini entsha ngokusayinisa lo mdlali.

UMakgalwa, oneminyaka engu-29 ubudala, uphuma esikhungweni sokuthuthukisa abadlali seMamelodi Sundowns.

 Usebe ngomunye wabadlali abavelele kwiBetway Premiership eminyakeni emibili edlule ngenxa yejubane lakhe nekhono lokuzivulela indlela ngomjiko.

Ngesizini ka-2024/25 washaya amagoli ayisithupha waphinde wakha angu-11 emidlalweni engu-32 kuyo yonke imiqhudelwano. 

Lokho kwamenza waqokelwa imiklomelo yeFootballer of the Season nePlayers’ Player of the Season.

Ngesizini edlule, u-Keletso Makgalwa uqhubekile nokugqama, wakha amagoli ayisishiyagalolunye emidlalweni engu-34.

Kubikwa ukuthi umqeqeshi weSimba, uSteve Barker, ungomunye wabantu abathanda kakhulu uMakgalwa, kanti neYanga nayo isivele ikhombise intshisekelo.

Yize kungakabi bikho isicelo esisemthethweni, kulindeleke ukuthi womabili la maqembu asheshe aqinise imizamo yawo yokumsayinisa.

• FUNDA NALA | Uyaqina umkhankaso kaZungu wokuhola iSafa

Nokho, ngeke kube lula ngoba namanye amakilabhu eBetway Premiership nawo afuna uMakgalwa.

IKaizer Chiefs ngelinye lamaqembu osekuke kwavela ukuthi nawo ayazishaya ngalo mdlali weSekhukhune.  

Kuthiwa iSekhukhune United ingavuma ukumdayisa kuphela uma ithola imali ehambisana nenani elibeke kuye. 

• EZISHISAYO| Cofa lapha usithole kuWhatsApp