Nokungenadonsi sekuyazintinyelela nje kwiChiefs – Baloyi
Ngu-Alfred Ngubane
Inkakha yeKaizer Chiefs uBrian “Spiderman” Baloyi isisole abagxeka leli qembu, ithi abaningi balihlasela ngoba lidonsa kanzima.
UBrian Baloyi uthi abanye babadlali bakudala babanga umsindo ngesimo seqembu nsukuzonke kodwa nabo “bahluleka ukwenza okungcono” ngesikhathi bethola ithuba kwiKaizer Chiefs.
Uthi manje sebesebenzisa leli qembu ngendlela engafanele ukuze bazakhele igama nodumo ezinkundleni zokuxhumana.
Ngokusho kwakhe, laba abagxeka kakhulu bahlale bekhuluma amazwi ahlabayo ngaMakhosi — futhi baphusha izinto zabo ezingalungile.
UBaloyi akazange akhulume ngokuqondile noma akhombe uJunior Khanye ngenjumbane, kodwa kuvele kwacaca ukuthi ungomunye walabo akhuluma ngabo.
“Basebenzisa lesi simo seqembu ukuze bazakhele udumo ekubeni abanye babo behluleka ngesikhathi sabo,” kusho le nkakha.
UBaloyi uphinde wanxusa abaqeqeshi besikhashana uBen Kalil Youssef noCedric Kaze ukuthi bakhombise ukuthembela kubadlali abasebancane eqenjini.
“Abaqeqeshi manje sebedinga ukukhombisa ukukholelwa kakhulu kubadlali abasebancane ngoba sebekhombisile ukuthi bayakwazi ukudlala uma benikezwa amathuba.
“Amathalente akhulayo afana noMfundo Vilakazi, Asanele Velebayi, Luke Bartman, Wandile Duba, noMduduzi Tshabalala kumele akhonjiswe ukwethenjwa,” kwengeza yena.
UBrian Baloyi, owayengunozinti owayengaconsi kubalandeli, uyazi kahle ingcindezi yokudlala kwiKaizer Chiefs.
Wajoyina le kilabhu eneminyaka engu-16 ngo-1994, wawina iBP Top 8 emdlalweni wakhe wokuqala.
Wabuye wanqoba isicoco seCoca-Cola Cup ngo-1996, wengeza nangezindebe ezimbili zeRothmans Cup.
FUNDA NALA | Ezimbi kwiSundowns kulimala isihlabani esimqoka
Uphinde wamela iBafana Bafana kwiFifa Confederation Cup, iNdebe yoMhlaba eyayiseFrance ngo-1998, nasemidlalweni yama-Olympics.
ZITHOLE ZISHISA: Cofa lapha usithole kwiWhatsApp Channel yethu
