Ngabe iChiefs incishwe iphenathi? UHlungwani uyaphendula
- Sibongiseni GUMBI
UVictor Hlungwani, owayengunompempe ezigabeni zebhola elikhokhelayo kuleli, useveze imibono yakhe ngephenathi engabekwanga nesuse umsindo.
Le phenathi yenzeke emdlalweni weSuperSport United neKaizer Chiefs ePeter Mokaba Stadium ngoMgqibelo ntambama.
Kube nesigameko esenzeke ebhokisini leSuperSport nesishaywe indiva unompempe wosuku, kwasuka umsindo ngaso ngemuva komdlalo.
Kulesi sigameko, umdlali weSuperSport, uBilal Baloyi ukhahlele kabi u-Edson Castillo weChiefs esebhokisini langakubo.
IChiefs ikhalele iphenathi kodwa unompempe wathi umdlalo awuqhubeke ngoba uBaloyi ubeqale ngokushaya ibhola.
UCastillo ugcine elimale kabana, wakhishwa kanti sekuvele ukuthi uzohlala okungenani izinyanga ezine engadlali ngenxa yalokhu kulimala.
Manje uHlungwani uthi nebala iChiefs ibanjwe ngophondo kulesi sigameko ngoba ngokwemithetho yebhola, bekumele ibekelwe iphenathi.
“Bekuyiphenathi ecacile. Uyayazi imithetho yebhola ikubeka kucace ukuthi uma ukhahlela omunye umdlali kumele uhlawuliswe, ibhola kumele libekwe phansi.
“Uma lokho kwenzeke ebhokisini, kuba yiphenathi,” kusho uHlungwani kwabeSNL24.
“Ngokusobala, uBaloyi ukhahlele uCastillo, hhayi ibhola. IChiefs bekumele ibekelwe iphenathi.
“Kunomunye umthetho othi uma kunephutha elingaba nomthelela emphumeleni womdlalo unompempe kumele athathe isinqumo.
“Kulokhu unompempe akakwenzanga lokho, kanti lokho yiphutha elibi,” kuchaza uHlungwani.
Uphinde waveza nokuthi igoli lesibili leRoyal AM, elishaywe uMotebang Sera bebhekene neSekhukhune Uninted bekumele lingabalwa.
Uthe uSera ubesesendaweni engamfanele njengoba eqale ngokuyositha unozinti okuyinto engavumelekile neze.
IRoyal AM igcine iwunqoba ngo 2-0 lo mdlalo wayo obuseHarry Gwala Stadium kanti beyinqoba okokuqala kule sizini.
