Kuvela okuhehe uZungu kuMaZulu, asayine nochithwe iBucs
- Alfred NGUBANE
AmaZulu FC asememezele ukuthi yiwo agcine enqobe umbango wokusayina umdlali onamava ochithwe yiMamelodi Sundowns ekupheleni kwesizini edlule.
UBongani Zungu usesayine kuMaZulu kanti uthi ubheke ukusiza leli qembu libe ngcono, futhi linqobe izindebe.
“Into engizibekele yona wukusiza iqembu linonkele liye phezulu kwilogi,” kusho uZungu, ngokwesitatimende saleli qembu.
“Ngifuna nokusiza abadlali abasebancane ngokusebenzisa amava ami.
“Wonke amaqembu esengidlale kuwo, nginqobe izindebe kanti ngifuna ukuletha umqondo ofanayo nalapha.
“Ngiyakwazi okudingekayo ukuze unqobe, futhi ngilethe lokho lapha,” kuqhuba lo mdlali odabuka eDuduza, eGoli.
Uthe into emchazile ngaMaZulu wukuthi adlala ibhola lesimanje ngaphansi kuka-Arthur Zwane noVusumuzi Vilakazi.
“Ngijabule nangokuthi ngizosebenza ngaphansi kuka-Arthur Zwane noVusumuzi Vilakazi,” kusho uZungu.
“Sengike ngayibuka imidlalo yaMaZulu, ayiqembu elidlala ibhola lesimanje.
“Ulwazi lwami lwebhola luzokwengeza okuthile eqenjini, kodwa ngiyazi kumele ngisebenze kanzima ukuthola indawo eqenjini.”
Usuthu lumemezele nokuthi lusayine uSandile Mthethwa obekade ekwi-Orlando Pirates odedelwe ngasekupheleni kwesonto elidlule.
