Kuvela ezishaqisayo ngesimo sikaMbule ekwiPirates
Umethuli we-podcast iNXL360 usedalule izinto ezishaqisayo ngokuphela kwesikhathi sika-Sipho Mbule kwi-Orlando Pirates.
Lo methuli uthi uMbule waqala ukungajabuli ngesikhathi engasadlali njalo.
Kuthiwa wazama ukudlula kumqeqeshi wayobika lolu daba kubaphathi beqembu.
Lokho akuzange kumsize, njengoba umqeqeshi wanquma ukungabe esamdlalisa nhlobo.
Kusolwa ukuthi uMbule wabe esebuyela emikhubeni yakhe yakudala eyayimdonsela emuva naphambilini.
“UMbule wakhungatheka waze waya kubaphathi wabatshela ukuthi, ‘Angisadlali, futhi lokho kubeka engcupheni ithuba lami lokuya eNdebeni yoMhlaba.
“‘Umqeqeshi (uHugo Broos) ungitshele ukuthi kufanele ngidlale njalo kwi-Orlando Pirates ukuze angikhethele iNdebe yoMhlaba.’
“Yilokho engikutshelwe yimithombo yami. Waya kubaphathi wabatshela ukuthi akajabule ngokungadlaliswa ngumqeqeshi.
“Ngemuva kwalokho waqala ukufika sekwephuzile ejimini. Kwabe sekuvela nezindaba zokuthi utholakale ephuze utshwala.
“Ngezwa nokuthi ngesikhathi iPirates idlala neCasric Stars, u-Sipho Mbule wayesemshadweni thizeni eMidrand, ephuza utshwala ngobusuku obandulela umdlalo.
“Kwakukhona nezindaba zokuthi wayefika ejimini nge-Uber, bese abaphathi bethola ukuthi imoto yakhe uyishiye endaweni abephuza kuyo ubusuku bonke.
“Lezo zindaba zazikhona. Ngicabanga ukuthi wahlolwa kabili kwatholakala ukuthi uphuze utshwala kwaze kwakabili.”
- FUNDA NALA | Owayedlala kwiRoyal AM uveza okwadunga izinto
Uqhube wathi ngemuva kwalokhu, u-Sipho Mbule waqala washintsha akangabe esaba yilo ohlezi ejabule futhi efaka umdlandla nakozakwabo.
“Wayengaseyena lo Mbule owayegqugquzela ozakwabo,” kuqhuba le nsizwa.
“Wayengasenandaba ngoba wayenomuzwa wokuthi abaphathi abazange bameseke ngesikhathi engasadlaliswa ngumqeqeshi.
“Kwagcina sekucacile ukuthi ngeke angene eqenjini leNdebe yoMhlaba, wabe eseqala ukucasuka.”
- EZISHISAYO| Cofa lapha usithole kuWhatsApp
