Kumiswe otshele abaqeqeshi kwezikabhoqo ‘ngokuncetheza’
Umusiwe umdlali ovele wagulukudela egunjini lokushintshela, watshela abaqeqeshi ukuthi abayeke ukuncetheza, babe nokuzethemba emsebenzini wabo.
Lesi sigameko esimangazayo kuvela ukuthi senzeke kwiRichards Bay FC edlala kwiBetway Premiership.
Umthombo weLisenethini uthe uzwe ngaye lo mdlali ukuthi unikwe incwadi emtshela ukuthi akake ame ukuzibandakanya neqembu.
Kuthiwa lo mdlali, uSiyethemba Sithebe, ucikwe yindlela okusethwa ngayo isikimu eqenjini, kudlaliswa abafana abancane.
“Uvele wangena egunjini lokushintshela yize kade engadlali yena, wafike wabatshela kwezikabhoqo.
“Uthe abayeke ukuthatha imiyalelo kusihlalo weqembu uJomo Biyela,” kusho lo mthombo.
“Ubatshele ukuthi badlalisa abafana abancane nje yingoba basuke betsheliwe futhi yingakho iqembu lingayo ndawo nje.
“Ubatshele ukuthi kwaBrandon Truter uhambe nje yingoba ubesekhathele wukulalela, waqala wazama ukwenza ngendlela yakhe, waxoshwa.”
Lo mthombo uthe yize ungeke uqinisekise, kodwa usola ukuthi kukhona abekhuthintile uSithebe ngesikhathi ekhuluma kanje.
Imizamo yokuthola iqembu ukuthi liphawule ayiphumelelanga, kanti ucingo lukaSithebe lusikhombe ezihlahleni.
