Kukhonye abeSundowns ezindondweni zePSL
UMiguel Cardoso, noLucas Ribeiro beMamelodi Sundowns yibona abawine izindondo ezinkulu emiklomelweni yazinyangazonke yeBetway Premiership ngoFebhuwari.
Umqeqeshi weMamelodi Sundowns, uCardoso, nomdlali wasesiswini, uRibeiro baklonyeliswe ngokusebenza kwabo okuhle ngale nyanga ephelile.
IPremier Soccer League (PSL) imemezele ukuthi uCardoso udle eyoMqeqeshi oVelele, kwathi uRibeiro wadla eyoMdlali oVelele neGoli eliVelele.
Bese kungokwesibili oCardoso noRibeiro bethola imiklomelo kule sizini ka-2024/25 ngemuva kwenyanga yempumelelo yeSundowns.
Ubuchule bukaCardoso buyabonakala
UCardoso unqobise iMamelodi Sundowns imidlalo eyisithupha emidlalweni eyisikhombisa, eqoqa amaphuzu angu-18 kwangu-21.
Ubuchule bakhe bobuhlakani bumenze wadla umhlanganiso kule ndondo yomqeqeshi ovelele.
Ubeyibanga no-Arthur Zwane noVusumuzi Vilakazi baMmaZulu FC noRonnie Gabriel weRichards Bay FC.
Ubungqwele bukaRibeiro abungatshazwa
Umdlali odabuka eBrazil, uRibeiro yena uqokwe njengoMdlali oVelele ngemuva kokudlala indima ebalulekile empumelelweni yeSundowns.
Ube nesanda emagolini ayisishiyagalombili ashaywe yileli qembu, eshaya amahlanu, wakhela ozakwabo amathathu.
Ubencintisana noKeletso Makgalwa weSekhukhune United nozakwabo kwiDowns u-Iqraam Rayners kulo mklomelo.
Ingcwenga yegoli limnike indondo
Igoli likaRibeiro alishaya bedlala ne-Orlando Pirates liwine indondo yeGoli leNyanga, okuphawula ukunqoba kwakhe okwesibili kulandelana kulesi sigaba.
Uhlule uTshegofatso Nyama weCape Town City noShauna Mogaila weSekhukhune kule ndondo.
AbeMamelodi Sundowns bakhonya kanjena nje kulezi zindondo kubafanele kwazise uFebhuwari ube muhle kakhulu kuyo.
- FUNDA NALA | UNabi weluleka uRanga Chivaviro okhacwa abalandeli
Ishaye zombili izinkunzi zaseSoweto, iKaizer Chiefs nePirates, yaphela inyanga ivule igebe lamaphuzu angu-18.
