UGoss ususe umsindo ngombono ngonozinti bangaphandle
- Sibongiseni GUMBI
Unozinti weMamelodi Sundowns, uRicardo Goss, obolekiswe kwiSuperSport United, usesuse inkulumompikiswano enzima.
Uvele nombono wokuthi kuvalwe onozinti bangaphandle kwiPremier Soccer League.
UGoss ukholwa ukuthi lokhu kuzosiza onozinti bakuleli bakhule futhi bathuthuke.
Ubona sengathi onozinti baseNingizimu Afrika bashoda ngamathuba okudlala njalo ngenxa yokugcwala kwabokufika.
“Sidinga ukulandela amaligi aseNyakatho Afrika,” kusho uGoss.
“Awabasayini onozinti bakwamanye amazwe ngoba babenenkinga efanayo phambilini.”
UGoss ubephendula umbuzo mayelana nokushoda konizinti bakuleli emaqenjini ePSL.
Emaqenjini angu-16 adlala kwiBetway Premiership, ayisishiyagalolunye asebenzisa onozinti bangaphandle.
Ekhuluma ohlelweni lweRadio 2000, iGame On, uthe amaqembu kumele athembele konozinti basekhaya.
“Ngaphandle uma kukhona umuntu ofana noDenis Onyango noma uKennedy Mweene,” kuqhuba uGoss.
Unomuzwa wokuthi onozinti bakwamanye amazwe kufanele basayinwe kuphela uma bengcono kakhulu kunabasekhaya.
“Uma othile ovela ngaphandle eza kuleli, kufanele aphakamise izinga noma abe ngaphezulu kwethu,” kwengeza uGoss.
Owayengunozinti we-Orlando Pirates u-Innocent Mayoyo naye uveze owakhe umbono ngalokhu.
“Ngiyavumelana ngiphinde ngiphikisane noGoss,” kusho uMayoyo kulo lolu hlelo.
“Esikhundleni sokuvimbela onozinti bakwamanye amazwe, asibe nemithetho yokubalawula.”
UMayoyo uphakamise ukuthi kube nemithetho elawula ukulethwa konozinti bangaphandle.
Uthe kungalandelwa indlela efanayo neyase-England elawula abadlali bangaphandle.
“Lokho kuzoqinisekisa ukuthi izinga lonozinti esibaletha lapha liphezulu,” kuchaza yena.
UMayoyo ucabanga ukuthi lesi simo kufanele sisingathwe ngokucophelela ukuze kugwenywe ukulimaza izinga lokuncintisana.
- OLUNYE UDABA: http://USeema ngeke amtotose uMbule, kuzomele alwe
“Sidinga isixazululo esisebenzela abadlali basekhaya nabangaphandle,” kwengeza uMayoyo.
