USeema ngeke amtotose uMbule, kuzomele alwe
- Sibongiseni GUMBI
Umqeqeshi weSekhukhune United, uLehlohonolo Seema, usephawule ngomdlali wakhe omusha obhekwe ngabomvu, uSipho Mbule.
UMbule ujoyine iSekhukhune ngosuku lomnqamulajuqu lokudayiselana ngabadlali kwiPSL.
Ubolekiswe isizini yonke yiMamelodi Sundowns abesehlale kuyo iminyaka engaphezu kwemithathu.
Lo mdlali oneminyaka engu-26 ubudala akakadlali kwiBabina Noko. Kodwa usePolokwane neqembu lapho lizicijela khona.
USeema uthi uMbule ujwayela kahle. Nokho, kufanele alwele indawo yakhe eqenjini eliqala imidlalo.
“Umdlali wethu wakamuva, bambiza ngo-‘Master Chef’,” kusho uSeema.
“Kodwa akakasiphekeli thina. Ngakho-ke angikwazi ukumbiza ngoChef okwamanje.”
Leli gama uMbule walithola ngenxa yendlela adlala ngayo, aphaka ngayo amabhola amahle kozakwabo.
UMbule udonse kanzima kwiSundowns njengoba belifana nabakhwekazi ijezi kuye.
Manje, usehlose ukuvuselela umsebenzi wakhe kwiSekhukhune.
“Uyazi ukuthi akazange ajoyine iqembu elingenabo abadlali. Sinabadlali basesiswini, abadlali basemuva, nabagadli,” kugcizelela uSeema.
UMbule kumele asebenze kanzima ukuze angene eqenjini. USeema ufuna abonise ukubaluleka kwakhe ejimini.
Lo mqeqeshi ukuncomile ukujwayela kukaMbule kahle esikwatini sakhe.
“Abadlali bayazana ngisho nangaphandle kwebhola. Badlala imidlalo yokuzithikozisa ndawonye,” kuphawula uSeema.
Isikhathi esichithwa ePolokwane sisize ekwakheni ubudlelwano eqenjini.
USeema ukholwa ukuthi lokhu kwenze uMbule azizwe esekhaya ngokushesha.
“Uziqeqesha kahle,” kuqhuba uSeema. “Okuhle ukuthi ubezilungiselela isizini neSundowns.
“Ngakho-ke, ngokwesimo somzimba, akakude kakhulu ngokokulungela ukudlala.”
Nokho lo mqeqeshi ukugcizelele ukuthi uMbule kumele aqonde indlela edlala ngayo iSekhukhune.
“Akukhona ukudlala ngendlela uSeema afuna ngayo. Kumele angene esakhiweni seqembu,” kwengeze yena.
USeema usenethemba ngenqubekelaphambili nokuthi uMbule uzoba wumdlali omqoka eqenini lakhe.
“Kuyathembisa, kodwa usenomsebenzi okufanele awenze.”
UMbule, ungumdlali wasesiswini onekhono uzokwengeza okuhle eqenjini.
ISekhukhune inethemba lokuthi isipiliyoni sakhe sizoqinisa esiswini sayo.
OLUNYE UDABA: UNabi uthembisa ukuhlwaya umhlaba wonke efuna umgadli
Abalandeli bamagange ukumbona ebuyela enkundleni, ekhombisa ithalente lakhe.
