ISundowns isishiye izimbangi zincela izithupha ngoMayele
IMamelodi Sundowns kubikwa ukuthi isishiye izimbangi – okukhona kuzo neKaizer Chiefs – zincela izithupha isayina uFiston Mayele.
Kubikwa ukuthi akuyona iKaizer Chiefs kuphela ekhale ngaphansi embangweni wayo neMamelodi Sundowns.
Kuthiwa kukhona namanye amaqembu amaningi akwamanye amazwe abezibhekile kuFiston Mayele, nawo agcine ehubha utalagu.
Ngokombiko we-Africafoot, amaBrazilian asevumelene ngemali yokudayiselana ebalelwa ku-R45 million nePyramids FC.
UFiston Mayele, oneminyaka engu-30 ubudala, kulindeleke ukuthi asayine inkontileka yeminyaka emithathu futhi ajoyine iSundowns ngesizini ezayo.
Lo mgadli waseCongo usanda kuphoxa iMamelodi Sundowns eyinqumela ogodweni kowamanqamu weCaf Champions League.
Useshaye amagoli angu-41 eminyakeni emibili ayihlale kuleli qembu lase-Egypt.
Ukufika kukaMayele kwiSundowns nokho kuveza ukungabazeka kwekusasa labanye abagadli, ikakhulukazi uPeter Shalulile noLebo Mothiba.
Umthelela kaShalulile wehlile ezinyangeni ezedlule, kanti uMothiba kusamele azinze kusukela efike ngoJanuwari kulezi zinkunzi zasePitori.
Njengomdlali wangaphandle, ukusayinwa kukaMayele kungase futhi kuphoqe iSundowns ukuthi ivule isikhala sakhe eqenjini.
Njengamanje leli qembu livele linoMarcelo Allende, uLucas Ribeiro no-Arthur Sales phakathi kwabadlali bangaphandle.
Nokho kuthiwa isivele imdedele uLucas Suarez okuzovula indawo eyengeziwe yomdlali wangaphandle eqenjini.
IKaizer Chiefs ibimataniswa kakhulu nalo mgadli osekuthiwa usengoweMamelodi Sundowns.
Namaqembu aseSaudi Arabia i-Al Riyadh, Al Kholood, ne-Al Khaleej nawo abezwakalise ukumthakasela.
Kodwa-ke, kubukeka sengathi iSundowns yenze okwanele, yaphinde yashiya isimbangi zibuka, zimangele isayina lo mgadli ohamba phambili e-Afrika njengamanje.
