Indodana kaDoctor Khumalo ‘iqhuba’ ifa likayise ebholeni
U-Doctor “16V” Khumalo usekhulume okokuqala ngendodaba yakhe uDiego ofuna ukungena ezinyathelweni zakhe nezikamkhulu wakhe ebholeni.
Uveze nesizathu esimenza angafuni ukugxambukela kakhulu ohambweni lwale ndodana yakhe ebholeni.
UDiego unethemba lokuqhuba isibongo sakubo esidumile ebholeni laseNingizimu Afrika.
Phela uyise u-Doctor Khumalo nomkhulu wakhe, u-Eliakim “Pro” Khumalo, bazakhela igama elihle kulo mdlalo.
Kodwa naphezu kokuyeseka ngokugcwele indodana yakhe, uDoctor uthi uDiego kumele azicabele eyakhe indlela.
Ukuveze lokhu ekhuluma ngemuva kokuthola ukuhlonishwa ngeziqu zobudokotela yiTshwane University of Technology muva nje.
Le ngwazi yeBafana Bafana ivumile ukuthi ukubukela indodana yayo ijaha iphupho lebhola akulula neze.
“Angikwazi ukumtshela ukuthi enzeni, kumele azikhethele owakhe umsebenzi,” kusho u-Doctor Khumalo.
Uphinde waveza ukuthi njengoba kwenza uyise kuye, naye unikele uDiego kubaqeqeshi bezinkulisa ezithuthukisa amakhono.
Kodwa-ke, uxwayise ngokuthi ukuziphatha yinto ebaluleke kakhulu futhi ke kulokho ngeke ayekelele.
“Uma enza okungalungile, ngiyamkhuza. Lapho-ke ngeke ngiyekelele,” kuqhuba yena.
Kubukeka sengathi iNingizimu Afrika izophinde ibone esinye isizukulwane salo mndeni sigila izimanga enkundleni.
Kodwa-ke u-Doctor Khumalo akafuni uDiego azithole enengcindezi ngenxa yegama lakhe nelikamkhulu wakhe.
