ICasric Stars isilungiselela impilo yakwiPremiership
- Alfred NGUBANE
UThabo Nthethe, osethimbeni labaqeqeshi kwiCasric Stars, uthi leli qembu selilangazelele ukudlulela kwiBetway Premiership.
Empeleni nje, uNtethe – ocija iqembu labadlali abaneminyaka engu-17 kuya ku-21 utshele iLisenethini ukuthi sebeqalile ukulungiselela ukudlala kule ligi enkulu ngesizini ezayo.
ICasric Stars ingelinye lamaqemnbu adlala kwiMotsepe Foundation Championship, aphethwe ngendlela encomekayo.
“Ngingasho ukuthi sidinga ukunqoba iMotsepe Foundation League ngamalengiso khona sizodlala kwiBetway Premiership ngesizini ezayo,” kusho uNtethe.
“Kumanje siqalile ukulungiselela iqembu lethu leDDC (DStv Diski Chalenge) ukuze singahlupheki uma ngabe sekumele sibe nalo.”
Uthe lesi sifiso akusona esabaphathi nje kuphela, kodwa nabadlali bayazi ngalezi zinhlelo zekilabhu.
“Abadlali beCasric Stars bayayazi into efunwa ngabaphathi beqembu nabo bayakujabulela ukulwela ukunqoba iChampionship ngamalengiso,” kusho uNthethe.
ICasric Stars iphunyukwe yiqhaza emlonyeni ngesizini ka-2022-23 ngesikhathi lihluleka ukuqoqa amaphuzu ngemidlalo yokugcina.
Lokhu kwagcina ngokuthi iPolokwane City inqobe iMotsepe Foundation League yalandelwa yiCape Town Spurs.
Nasemidlalweni yokuhlungela ukunyuselwa kwiPremiership, leli qembu laseMpumalanga lakhala ngaphansi.
Kule sizini, iCasric Stars isendaweni yesithathu ngemuva kokuqoqa amaphuzu angu-13 emidlalweni eyisithupha.
Isalele ngelilodwa kwiMilford FC ezihola phambili kulesi sigaba, kati iyalingana ngamaphuzu ne-Upington City ekweyesibili – umehluko amagoli.
