ISekhukhune ifake usawoti esilondeni, uRiveiro ukhala ngehaba
UJose Riveiro ukhale ngokuthi akafuni kwenziwe ihaba ukuhlulwa kwe-Orlando Pirates.
I-Orlando Pirates iguqiswe kabuhlungu yiSekhukhune United emdlalweni weBetway Premiership ngoLwesithathu ebusuku.
Lokhu kunqoba kweBabina Noko kufane nokuhlikihla usawoti esilondeni esisesisha njengoba iPirates beyibuya komunye umdlalo ephoxeke kuwo.
Bese kungokwesibili kulandelana i-Orlando Pirates ihlulwa. Ishaywe yiPyramids ngo 3-2 ngoLwesihlanu koweCaf Champions League.
Iphindwe yiSekhukhune, eyifake induku ka 1-0, yayibambezela emjahweni yayo yesicoco sePremiership esibanga neMamelodi Sundowns.
Igoli leSekhukhune lishywe uTresor Tshibwabwa ngesiwombe sesibili, lagcina liyidlile iPirates.
Nokho uJose Riveiro ukhale ngokuthi akumele kwenziwe ihaba ngalo mphumela ngoba usayethemba yena i-Orlando Pirates.
Yize seyisele ngamaphuzu angu-12 kwiMamelodi Sundowns, eshaye iRuchards Bay FC ngo 3-0 ngawo uLwesithathu ebusuku.
“Bekubukeka singalithola igoli, kodwa kwaba yibo abathola igoli kuqala,” kusho uRiveiro.
“Ngemuva kwalokho asikwazanga ukuvuka sizithathe. Siphelelwe amaqhinga.”
Uthe umdlalo bewuvuna bona kwaze kwaba iSekhukhune ithola igoli, wavuma ukuthi abenzanga okwanele ukuthola elokulinganisa.
“Ngicabanga ukuthi sewenza ihaba ke manje,” kusho uRiveiro ebuzwa ngokuthi asenjani amathuba njengoba behluliwe.
“Sihlulwe umdlalo owodwa nje. Kumele sivuke sizithathe, sinomdlalo womkhaya ngoMgqobelo, kumele sibe sesilungile, akukho okunye.”
IPirates isizoyobhekana neKaizer Chiefs emdlalweni olandelayo weligi kanti sekumele nakanjani iwunqobe.
Ukuhlulwa okwesithathu kulandelana kuzoyenza isale kakhulu kwiSundowns ebukeka isivele iseduze nokusivikela isicoco sayo.
