Sesiqinisekisiwe esikaKhoza nesigungu sakhe kwiPSL
- Intatheli yeLISENETHINI
U-Irvin Khoza usephinde waqokwa njengosihlalo wePremier Soccer League ngaphandle kokuphikiswa.
Kuqokwe namanye amalungu ayisikhombisa azongena ekomidini eliphezulu okhethweni lweNational Soccer League ngoLwesithathu ntambama.
UKhoza, oneminyaka engu-76 ubudala, uqinisekiswe yiPSL njengoyena yedwa ongenele ukhetho lwesikhundla sikasihlalo.
Uzophinda elinye ihlandla leminyaka emine ephethe le nhlangano eyengamele ibhola elikhokhelayo kuleli ezinze eParktown.
Usevele uneminyaka engu-22 ekulesi sikhundla sokuhola iPSL futhi usenze umsebenzi oncomekayo okwenze ozakwabo babone efanelwe elinye ihlandla.
Bangu-11 abebephakanyiswe ukungena esigungwini esiphezulu sePSL ngeledlule okukhona kubo uKaizer Motaung, uMato Madlala, uRejoice Simelane, u-Abram Sello, uStanley Matthews, uJohnny Mogaladi, uSandile Zungu, uRobert Benadie, uJohn Comitis, uTim Sukazi noSifiso Biyela.
Bayisikhombisa kuphela abaqokiwe futhi lesi sigungu sesiqinisekisiwe manje.
Kungene laba: uJomo Biyela weRichards Bay, uMato Madlala weGolden Arrows, uStan Matthews weSuperSport United, uJohnny Mogaladi wePolokwane City, uKaizer Motaung weKaizer Chiefs, uRejoice Simelane weMamelodi Sundowns noTim Sukazi weTS Galaxy.
Khonamanjalo, uJohn Comitis noRob Benadie baphumile esigunwini esiphezulu abebeyingxenye yaso ngehlandla elidlule.
