Ingwazi ibona ‘kuvuka uGareth Bale’ ngoMohau Nkota
Owayengukaputeni we-Orlando Pirates uBenedict ‘Tso’ Vilakazi useveze umbono wakhe ngoMohau Nkota othuthele kwi-Al-Ettifaq edlala kwiSaudi Pro League.
UMohau Nkota uzodlala nengwazi yaseNetherlands eyayisihlabani kwiLiverpool uGeorginio Wijnaldum eqenjini lakhe elisha.
UVilakazi, owake wadlala nakwiMamelodi Sundowns uncome indlela uNkota ahlasela ngayo athi imkhumbuza uGareth Bale wodumo kwiReal Madrid.
Uthi lo mdlali oneminyaka engu-20 ubudala unekhono elihle lokukhahlelela ipali, unejubane namandla – njengoBale.
“Engikuthandayo ngoNkota wukuthi ungikhumbuza uGareth Bale ngoba uyazazi ukuthi unekhono lokukhahlelela ipali, ijubane namandla…
“Futhi lezo zinto njalo uzisebenzisa ngendlela efanele,” kusho uVilakazi kwi-iDiski TV kuleli sonto.
“Ugijima adudle ulayini edonsa imbangi emgadile, bese esika angene ngaphakathi ngokushesha ukuze asebenzise ikhono lakhe lokukhahlelela ipali.
“Kuyisibusiso ukuthi aye kuleya ligi ngoba uzodlala nabadlali abafana noRonaldo nabanye abanegama asebeke banqoba izinto ezinkulu.
“Ulwazi azoluthola ngokuba seduze nabantu abanqobe iNdebe yoMhlaba neChampions League alunakuqhathaniswa…
“Uzofunda okuningi kubadlali abafana noCristiano Ronaldo noSadio Mané ngoba bakhona futhi bake bawina izinto ezinkulu phambilini.”
UMohau Nkota ube nesizini enhle kumaBhakabhaka, wadlala imidlalo engu-39 futhi waba nesandla emagolini angu-12.
Nokho uVilakazi ukholwa ukuthi iziqhwaga zaseSoweto zisheshe zanyakaza ukuqinisekisa ukuthi ukushiya kukaNkota akubi nomthelela omkhulu.
Uthi ukusayinwa kwesihlabani seBafana Bafana u-Oswin Appollis kuwuphawu olusobala oluveza ukuthi ukuhamba kukaNkota bekulindelwe.
U-Appollis, osayiniswe esuka kwiPolokwane City, uphakathi kwabadlali abasha abangu-11 abasayinwe yiPirates ngaphambi kwesizini ka-2025/26.
“Ngimfisela konke okuhle umfana phesheya kwezilwandle nakuba kuzoba naleyo mibuzo yokuthi kungani eye eSaudi Arabia akangaya ePortugal noma eSpain,” kwengeza uVilakazi.
“Kodwa uma uphesheya kwezilwandle, usendaweni lapho wonke umuntu engakubona khona.
“Yingakho iPirates ilande u-Appollis ngoba ngicabanga ukuthi beyazi ukuthi izolahlekelwa ngumdlali oyedwa phakathi kuka(Relebohile) Mofokeng noNkota.
“IPirates ayilimalanga kangako ngoba vele yena (uNkota) ubengajwayele ukuqala imidlalo – engena esuka ebhentshini.
“Kodwa bekuthi lapho engena, ubefika kucace futhi umthelela wakhe ubonakale eqenjini… ngimfisela konke okuhle kakhulu.”
