Ilukuluku kwabePirates bebona uPedersen ‘endiza’ 

Kuvele kwasuka isasasa kubalandeli be-Orlando Pirates bebona izithombe zomgadli omusha u-Sebastian Pedersen eziqeqesha neqembu.

Lezi zithombe ziyingxenye yezifakwe yiPirates eziveza amalungiselelo eqembu omdlalo weMTN8.

EziMnyama zizogadulisana neSekhukhune United e-Old Peter Mokaba Stadium ngoMgqibelo ngo-3 ntambama.

Lona kuzobe kungumdlalo womlenze wokuqala, kanti owesibili uzoba se-Orlando Amstel Arena ngempelasonto ezayo.

Nokho ngaphambi kwawo, lamaqembu azophinde khiphane inkani emdlalweni weligi ngoLwesithathu ebusuku.

Besabela kulezi zithombe ezinoPedersen – osevele uyintandokazi yabalandeli yize engakaze adlale – bavele bakhombisa enkulu injabulo.

U-@OpulenceKay uphendule wathi: “Sifuna ukubona uBaby Haaland enkundleni kusasa.” 

U-@salmanea yena uthe: Usekulungele ukudlala mqeqeshi. Mfake eqenjini eliqala umdlalo kusasa.”

U-@Wrong__Train wathi: “Umthakathi wezindaba ubuyile bfethu. Sizowina kwasani kule sizini.”

Umlandeli wezimbangi zePirates, u-@JUST1HEGO2T yena uthe: “Kuzoba yintokozo enkulu kimi ukubuka lo mfowethu ngeso lenzondo kule sizini.” 

U- @SimOwele_ wathi: “Umfana wethu uma esendiza kanjena sekuzolunga.”

U-@rich_freez yena wathi: Ngethemba ukuthi nisibonisa uHaaland wethu ngoba nizomdlalisa kusasa ngoba ngizociceka uma ngingamboni ohlwini lwabadlalayo.”

U-@Anastacia247722 yena uxwayise ngokugconwa abazokuthola abalandeli bePirates uma izinto zingamhambeli kahle uPedersen. 

“Lesi sithombe sizosenza inhlekisa kabuhlungu uma izinto zingahambi kahle.” 

Umqeqeshi we-Orlando Pirates u-Abdeslam Ouaddou kuleli sonto uthe ngeke avele amphonse ‘emlilweni’ u-Sebastian Pedersen.

• FUNDA NALA | UShabalala ubhodla ngokulimala okwamgqilaza

Uthe okwamanje akakulungeli kahle ukudlala ngoba usazijwayeza izimo zaseNingizimu Afrika. 

Kodwa lesi sithombe sakhe ‘endiza’ ejimini sesivuselele ilukuluku lokulangazelela ukumbona enkundleni kubalandeli.

• EZISHISAYO| Cofa lapha usithole kuWhatsApp