Iligi ‘uzoyinqoba’ noma ebanjwa ngophondo uMiguel Cardoso
Umqeqeshi weMamelodi Sundowns uMiguel Cardoso, kwale kancane akhale ngokubanjwa ngophondo kwezakhe.
UMiguel Cardoso, obecikekile, ushaye ngezinqamulelayo ekhuluma nabezindaba ngemuva komdlalo wezakhe neGolden Arrows.
“Ngifuna ukucacisa lokhu: uma izimo zilungile, sizoba ngompetha, noma izimo zingalungile, sizophinda sibe ngompetha,” usho kanje kwabeSuperSport TV.
- ZITHOLE ZISHISA | Cofa la, ujoyine iWhatsApp Group yethu
Esekhuluma emhlanganweni nabezindaba othathe imizuzu engaphansi kwemihlanu, uMiguel Cardoso ukhale ngokusebenza konompempe.
Bekungadingeki ukuthi uze umbuze uMiguel Cardoso ukuthi ucikekile ngezinqumo zikanompempe kulo mdlalo.
Nokho ukwazile ukuzibamba, wakugwema ukukhuluma izinto ebezingamfaka ekukhulumeni nasemacaleni nePSL.
ISundowns idlale ngokulingana ngo 1-1 neGolden Arrows eMpumalanga Stadium ngoLwesithathu ebusuku.
Owayengumqeqeshi weSundowns uManqoba Mngqithi ubehola i-Arrows okokuqala kulo mdlalo.
Yize inqobe ngesiwombe sesibili iSundowns ayikwazanga ukubhodloza udonga lwe-Arrows obelungagayelwe zinkobe.
Lo mphumela ugcina iSundowns iqhwakele kwiBetway Premiership ngamaphuzu angu-55 emidlalweni engu-21.
Ishiya i-Orlando Pirates ngamaphuzu angu-16 kwilogi. IPirates inqobe ngo 1-0 ibhekene neChippa United ngobusuku obufnayo.
UCardoso utuse abadlali bakhe yize bengakwazanga ukuqoqa amaphuzu agcwele.
“Abazange babe nesiwombe sokuqala esihle, kodwa badlale kahle kakhulu ngesiwombe sesibili. Bekusifanele ukuwina,” usho kanje.
Lo mqeqeshi uveze ukungaphatheki kahle ngonompempe kodwa akangafuna ukukhuluma kakhulu.
“Umdlalo waleli zinga kufanele uphathwe ngezinga eliphezulu ngonompempe,” kwengeza yena.
“Ngeshwa, sibone izinto engingafuni ngisho ukukhuluma ngazo zenzeka kulo mdlalo.”
Lapho ecindezelwa ngonompempe, uvele wacasha ngesithupha: “Cha, cha, ngikhuluma nje ngokujwayelekile.”
Ebuzwa ukuthi ngabe ukubuyela enkundleni ngokushesha ngemuva kokubhekana neKaizer Chiefs kudale ukukhathala yini, uwuchithile lo mbono.
“Sifuna imidlalo enobulungiswa, la wonke umuntu elandela imithetho ngokufanele. Yilokho nje.”
