Igwaze ibhece iPirates kwiLioli, u-Ouaddou akanelisekile
I-Orlando Pirates izidlulele ngeubo kwiLioli FC yaseLesotho emdlalweni womlenze wokuqala esigabeni sokuhlunga kwiCaf Champions League inqoba ngo 3-0.
Kube uTshegofatso Mabasa iqhawe eshaya amagoli amabili alandelana eduze esiwombeni sesibili – elesithathu lishaywe ngu-Oswin Appollis.
Ekhuluma ngemuva komdlalo, umqeqeshi we-Orlando Pirates u-Adbeslam Ouaddou uthe akanelisekanga ngokugcwele yize benqobile.
“Angicabangi kanjalo. Kusamele siqedele emlenzeni wesibili,” kusho u-Ouaddou uma ebuzwa ukungabe sebewelele emzuliswaneni olandelayo ngalo mphumela.
“Sibe nomdlalo omuhle futhi silihoniphile icelo lokudlala – ngiyababongela abafana bami.
WINA | Ithuba lokuwina neVicks neLisenethini
“Manje kufana nokuthi sisaqede isiwombe sokuqala. Ngeke ngeneliseke ngokugcwele ngoba ngibona sengathi besingashaya amagoli amaningi.
“Asenzanga kahle kulokho, ikakhulukazi esiwombeni sokuqala la singakwazana ukuvula izikhala zokuya phambili – izikhala ngemuva kwezitobha zabo.
“Kodwa lokho bekungenza yecebo elihle lezimbangi. Ngijabule ngesiwombe sesibili la senze khona izinguquko ezifike nesivinini ezimpondweni.”
FUNDA NALA | UDiyo Sibisi usadlala eneminyaka engu-43
Umlenze wesibili walo mdlalo – la iPirates sekumele iqedele khona umsebenzi ekhaya e-Orlando Stadium – uzoba ngoMgqibelo ozayo.
Umqeqeshi weLioli, uthe umdlalo akukakapheli futhi bazozama ukuyidumaza phambi kwabalandeli bayo basekhaya i-Orlando Pirates.
