IDurban City isimhlonzile ozovala esikaBadela
Ngemuva kokuxoshwa isigubhukane kukaSinethemba Badela, iDurban City ayichithanga sikhathi ukuhlonza umuntu ongase athathe izintambo.
USinethemba Badela udedelwe yiCitizens ngoMsombuluko ngemuva kokuthi ebesaphathe imidlalo emithathu kuphela.
Manje iSoccerBeat isidalule ukuthi uJohn Maduka nguye ohamba phambili ekubeni ngolandelayo ukungena kulesi sihlalo esishisayo.
UMaduka, ongumqeqeshi weMagesi FC, ubonwa njengomholi odingwa yiDurban City kule midlalo engu-13 yokugcina kule sizini.
ITHONYA LIKAMADUKA
Ibhodi leDurban City kubikwa ukuthi lifuna “umqeqeshi olungele ukusebenza” futhi oyiqonda lahle ingcindezi yebhola laseNingizimu Afrika.
UMaduka oneminyaka engu-55 ubudala ubonakala engena khaxa kulezi zimfuno ngenxa yokuthi:
- Unamava: Uzakhele igama ngokuhola iRoyal AM yaqeda endaweni yesithathu kwiBetway Premiership eminyakeni emibili edlule.
- Uyayazi iDurban City: Uke wasebenza isikhashana kuleli qembu phambilini.
- Uyakwazi ukuzivumelanisa nezimo ngokwamacebo: Ngokungafani nefilosofi eqinile kaBadela, uMaduka uyakwazi ukudlalela ukunqoba.
- Ujwayele eKZN: Njengoba ehlale isikhathi eside KwaZulu-Natal neRoyal AM, uyasiqonda isimo sebhola lakhona nokulindelwe abalandeli.
UKUCIKIZA KWEMAGESI
Lesi sinyathelo singenziwa sibe lula wukuthi uMaduka ubonakala evele esephelelwe yindawo kwiMagesi FC.
Selokhu kuqale lo nyaka ikusasa likaMaduka alicacile njengoba engasahlali nasebhentshini muva nje.
Uma iDurban City ifaka isicelo esisemthethweni, kukholakala ukuthi iMagesi ngeke ime endleleni yalosomaqhinga waseMalawi.
BAKHONA ABANGA NABO
Yize uMaduka ehamba phambili, iDurban City kubikwa ukuthi inabo abanye abaqeqeshi ecabangela kubo.
FUNDA NALA | Kushube isimo kwiSundowns kumiswa osolwa ngokweba
Le kilabhu kulindeleke ukuthi yenze isimemezelo emahoreni ambalwa ezayo ngokuthi ngubani ozothatha lo msebenzi wokulicija.
Kukholakala ukuthi uPitso Dladla nguyena othathe izintambo zokucija iqembu ngoMsombuluko ngemuva kokuhamba kungazelelwe kukaSinethemba Badela.
