ICity idlala umacashelana ngofunwa elaseTunisia
Umgadli wePolokwane City u-Oswin Appollis kuthiwa usebumnyameni ngekusasa lakhe njengoba iqembu lingacacisi ngokumdayisa.
Lokhu kwenzeka nje izinkunzi zaseTunisia, i-Esperance, zisha amashushu ngalo mdlali ogijima nakwiBafana Bafana.
Ngokubika kweSABC Sport leli qembu laseTunisia selibeke etafuleni isicelo sokudayisela semali enkulu ukwedlula esawo wonke amaqembu ePremier Soccer League afuna lo mdlali.
Kuvela ukuthi u-Appollis ubeselindele ukucaciseleka manje ngekusasa lakhe kodwa kusathule.
Ngaphezu kwalokho, kuyaqondakala ukuthi i-Esperance yenze konke okusemandleni ayo ukukhombisa ukuthi iqotho emizamweni yayo yokuhehela lo mdlali weBafana Bafana eNorth Africa ngaphambi kokuthi kuqale isizini ka-2024/25.
ISABC Sport ibike ukuthi i-Esperance ithumele iCity isicelo esibhalwe phansi kodwa kuzekube manje ayikayithole impendulo.
Ngokuma kwezinto njengamanje, kungenzeka kugcine kungavunyelwananga yize leli qembu laseTunisia libuye nesicelo esibuyekeziwe njengokucela kweCity.
Imibiko iphinde yamatanisa u-Appollis neKaizer Chiefs, Mamelodi Sundowns ne-Orlando Pirates.
Nokho alikho kulamaqembu eselike lakuqinisekisa ukuthi liyamfuna lo mdlali.
ICity isivele iqalile ukuzicijela isizini ezayo nomqeqeshi uPhuti Mohafe ngaphambi komdlalo wayo wokuvula isizini.
ICity izovakashela iSundowns kuma-quarterfinal eMTN8 ngo-Agasti 11 eLucas Moripe Stadium.
Kusazobonakala ukuthi u-Appollis usazoba ngumdlali weRise and Shine ngaphambi kwalowo mdlalo njengoba i-Esperance isenethemba lokunikwa imvume yokuxoxisana nomdlali ngaphandle kokuthi itshelwe ukuthi ihambe.
I-SABC Sport ixhumane nemenja ka-Appollis uLance Davids ukuze acacise kabanzi ngokuthi kungani kungase kuhoxiswe ukufudukela kwakhe kwi-Esperance.
“Mhlawumbe uzothola impendulo engcono kulawa makilabhu womabili,” kusho uDavids.
“Kodwa ngasohlangothini lwethu senze konke okusemandleni ukuzama ukuthi kuxoxiswane.
“Esikuqondayo ukuthi i-Esperance yaletha isicelo sokuqala, abasithuthukisa ngokuhamba kwesikhathi.
OLUNYE UDABA: Okwenza uMngqithi aqine idolo ngeDowns
“Kodwa abakwazanga ukuthola impendulo eqenjini. Mhlawumbe iPolokwane City inezinye izinhlelo esingazi ngazo.”
