IChiefs nombiko ngabalimele okukhona kubo noSirino
- Sibongiseni GUMBI
Ikhefu leFifa linikeze abadlali beKaizer Chiefs abalimele ithuba lokugxila ekululameni.
Abadlali abaningana abamqoka banesa ukulimala okuncane, kanti kungenzeka kuthi kuqala imidlalo bebe sebeluleme ngokugcwele.
Ngokusho kukadokotela wale kilabhu, uDave Milner, uGaston Sirino, osanda kulimala umsipha, kulindeleke ukuthi aqale ukuzilolonga ngokugcwele kungakapheli amasonto amabili.
Ukulimala kukaSirino kuzoba nomthelela omubi eqenjini njengoba kade esefomini, kunguye olawula iminyakazo yalo yokuhlasela.
Lo mdlali osayine ngemuva kokudedelwa yiMamelodi Sundowns, usenegoli, waphinde amanye amabili emidlalweni emithathu.
Umdlali wasesiswini uGeorge Matlou naye useqalile ukugijima nokuthinta ibhola, kanti yena kuthiwa uzobuya ngokugcwele ngoNovemba.
Umdlali wasesiswini uTebogo Potsane, owasonteka iqakala emasontweni amathathu edlule, uzobe engadlali amasonto amathathu engeziwe ngenxa yokulimala kwemisipha.
Umdlali wasemuva waseMozambique u-Edmilson Dove naye welulama kahle njengoba eselikhiphile iguzu lokuqondisa unyawo. Kulindeleke ukuthi aqale ukugijima ngoNovemba.
Unozinti uBrandon Petersen naye useluleme ngokugcwele ngemuva kokukhishwa ophini emunweni wakhe obulimele futhi manje usebuyele ekuzicijeni neqembu ngokugcwele.
Khonamanjalo, iChiefs izogadulisana neMarumo Gallants emdlalweni wokuzwana amandla, iCafu Cup eFree State Stadium, eBloemfontein.
Lo mdlalo uzoba ngeSonto ntambama kanti uyingxenye yemigubho yakuleli dolobha ebizwa ngeCafu, okwakuyiMacufe phambilini.
