UHlungwani ucacisa eyamaphutha ka-Abongile Tom
- Sibongiseni GUMBI
Yize kugqame kakhulu iphutha eliholele egolini lesibili le-Orlando Pirtaes emdlalweni wamanqamu weMTN8 ngoMgqibelo, abemaningi namanye anganakwanga.
Owayengunompempe, manje osengumhlaziyi, uVictor Hlungwani useveze ukuthi negoli lokuqala kulo mdlalo bekumele ngabe alibalwanga.
Kuleli goli leStellenbosch FC, uThabiso Moloisane uphonse ibhola walifaka ebhokisini, lahlangana noLehlohonolo Mojela, walinamathisela enethini.
Kodwa ehlaziya izinqumo zonompempe ohlelweni lweSABC 1, iSoccerZone ngoMsombuluko ebusuku, uHlungwani ushaye amakhala ngalo.
“Sizokhuluma ngendlela okumele ilandelwe namuhla,” kusho uHlungwani.
“Indlela yokwenza uma kunekhona ithi ibhola kumele ibekwe kule ndawo edwetshiwe ekhoneni.
“Ozokhahlela akumele alithinte kabili ibhola. Kodwa uSaleng uliphinde kabili. UMojela ukubonile lokho.
“Lokhu akuyisebenzelanga iPirates, kodwa umsizi kanompempe bekumele ngabe ubahlawulisile vele ngokuthi uSaleng uselithinte kabili.”
Ube esedlulela egolini leStellies, athi nalo kube nephutha elenzekile, futhi bekumele ngabe alibalwanga.
“Asidlulele esigamekweni sesibili – indlela yokuthathwa kwebhola ebeliphumele ngaphandle (throw-in).
“Uma uthatha lelo bhola, kumele kube la ibhola liphumele khona. Futhi kumele ibhola uliphonse lisuke ngemuva kwekhanda.
“Manje asibheke ukuthi kwenzeke kanjalo yini – inzima kakhulu le, kodwa wumthetho ngakho kumele ulandelwe.
“Uyabona laphaya la liphume khona ibhola. Abadlali bayaziwa uukuthi bayaye bahlehle ukuze bathole amandla okulishwiba kahle ibhola.
“Nangu uThabo Moloisane eliphosa, ngabe uliphosela la liphume khona? Kunzima ukubona ngoba unompempe akulula abone ukuthi liphumeephi ngampela ibhola.
“Kulokhu kuyigunya likanompempe ukuthi athi usesuke kakhulu la liphume khona ibhola.
“Kodwa kulokhu uyabona usekude kakhulu, sekwedlule cishe ngamamitha cishe amane, futhi unompempe bekumele ambuyisele emuva.”
Uthe ngenxa yalokhu, nalo leli goli leStellies bekumele lichithwe, ngoba kwephulwe umthetho ngaphambi kokuthi lingene.
Nelesibili lePirates uthe bekumele lingabalwa ngoba ngesikhathi uMofokeng elisusa, belingekho la kwenzeke khona isigameko.
