IChiefs ishiye uNabi iyodlala kwiHome of Legends Cup
- Sibongiseni GUMBI
IKaizer Chiefs ilibangise eGqeberha kule mpelasonto. Izodlala kwiHome of Legends Cup yokuqala eNelson Mandela Bay Stadium ngoMgqibelo.
Lo mqhudelwano uthembisa abalandeli ibhola elijabulisayo. Nokho Amakhosi azodlala engekho umqeqeshi wawo uNasreddine Nabi.
Lo mqeqeshi usanda kuhlinzwa kulandela ukuthinteka okuncane. Iqembu lilindele ukuthi abe esebuyile emdlalweni walo olandelayo weligi neRichards Bay ngoNovemba 27 ePolokwane.
Njengoba engekho uNabi, amaphini akhe, oKhalil Ben Youssef noCedric Kaze yibo abazohola iqembu.
IChiefs izobhekana neGolden Arrows kowandulela owamanqamu wokuqala. Umdlalo uqala ngo-10 ekuseni ngoMgqibelo.
Ngemuva kwalokho, iMamelodi Sundowns izodlala neChippa United ngo-1 ntambama.
Umdlalo wamanqamu, ozodlalwa amaqembu anqobe kweyandulela owamanqamu, uhlelelwe uukuqala ngo-5 ntambama.
IChiefs lokwenza kahle kulo mqhudelwano yize uNabi ezobe engekho. Leli qembu lihlose ukwenza kahle.
Lo mqhudelwano unikeza iqembu ithuba lokuthi liqinisekise ukuthi abadlali bahlale bebukhali ngesikhathi sekhefu lamazwe ngamazwe.
Lo mqhudelwano uhlinzeka iChiefs ngethuba lokulungisa kahle amacebo ayo okudlala.
Abalandeli bangalindela imidlalo esezingeni eliphezulu, lapho womane amaqembu ebheke ukukhombisa ibhola elihle.
IChiefs ifisele umqeqeshi uNabi ukululama ngokushesha futhi ibheke ngabomvu ukuthi abuyele enkundleni maduze.
I-Home of Legends Cup ayigcini nje ngokubungaza ibhola kodwa futhi ihlonipha ifa lezemidlalo eNingizimu Afrika.
Ngohlelo olufaka nomculo, namaqembu aphezulu, lo mqhudelwano nakanjani uzoletha injabulo.
