I-PSL isimemezele abadle izindondo zenyanga kwiBetway Prem

I-Premier Soccer League (PSL) seyibamemezele abadle izindondo ngokwenza kahle kwiBetway Premiership ngenyanga kaMandulo noMfumfu, kanti bonke baqhamuka emaqenjini ehlukene.

UThapelo Mokobodi we-Orlando Pirates, u-Arthur Zwane waMaZulu FC noTeboho Mokoena weMamelodi Sundowns yibo abadle lezi zindondo. 

UMokobodi, oseshaye into ecokeme selokhu efike kwiPirates, uhlomule ngendondo yoMdlali oVelele kulezi zinyanga ezimbili kulandela ukukhombisa izinga eliphezulu.

Lo mdlali wasesiswini ube nesandla emagolini amahlanu ePirates ngokwakhela ozakwabo amagoli amahlanu. 

Uphinde wasiza iBucs ukuthi inqobe imidlalo emihlanu, izibeke endaweni yesibili kwilogi njengoba ivikela isicoco seligi.

Uhlomule ngale ndondo ebhekene nomncintiswano onzima, njengoba ebeyibanga nabadlali baMaZulu uThandolwethu Ngwenya noNkosikhona Radebe, nabo abebedlala kahle kakhulu.

UZwane yena uqokwe njengoMqeqeshi oVelele kulezi zinyanga. Uhole AmaZulu enqoba imidlalo emihlanu, wakhuphula iqembu walibeka endaweni yesithathu kwilogi.

Uhlule abaqeqeshi abebencintisana naye okubalwa kubo u-Abdeslam Ouaddou wePirates, owahlomula ngale ndondo ngoNcwaba, noMiguel Cardoso weSundowns, iqembu lakhe elisahamba phambili kwilogi.

UMokobodi noZwane bathole lezi zindondo okokuqala ngqa emisebenzini yabo.

UMokoena yena uhlomule ngendondo yeGoli eliVevele kulezi zinyanga. 

Lo mdlali wasesiswini weSundowns uwine ngegoli alishaye engaphandle kwebhokisi bebhekene neGolden Arrows.

Uhlule uVincent Pule, owashaya igoli nge-free kick bebhekene neMarumo Gallants, noLuphumlo Sifumba waseDurban City, naye owashaya igoli nge-free kick bebhekene neMilford FC.

• FUNDA NALA | UDa Cruz nezinhle ngoPhili kwiChiefs

Khonamanjalo, njengoba i-PSL igubha iminyaka engu-30 yasungulwa, uhlelo lweBetway i-S’bonise & Win luyaqhubeka nokuklomelisa abalandeli.

Bangu-49 abalandeli asebehlomule u-R30 000 ngamunye kuze kube manje. 

Laba balandeli bathole le mihlomulo ngokugqoka kahle ukwedlula bonke emidlalweni yasekhaya yamaqembu abo ekhonjiswa kumabonakude, kanti kusazoba nabanye abazohlomula.

• EZISHISAYO!| Cofa lapha usithole kuWhatsApp