I-Orlando Pirates nezinhle ngaphambi koweCarling KO
I-Orlando Pirates isikhiphe isimemezelo sezindaba ezinhle ngaphambi komdlalo wangoLwesibili ebusuku la izogadulisana khona neMagesi FC.
Lezi ziqwhaga zaseSoweto zizokwamukela iMagesi emdlalweni obhekwe ngabomvu wesigaba sesibili kwiCarling Knockout e-Orlando Stadium ngo-7 ebusuku.
Izindaba ezinhle? Ngezokuthi i-Orlando Pirates ayinaye umdlali olimalile ngempelasonto edlule futhi izobe ihlome iphelele kulo mdlalo.
“Azikho izinkinga ezintsha zokulimala kwabadlali naphezu kwempi ebinzima ngoMgqibelo,” kusho iPirates esitatimendeni.
“Okusekhona yikho okoSelaelo Rasebotja noThabiso Sesane abaqhubekayo nokululama ukuze babuyele esimweni ezijwayelekile.”
Ngaphandle kukaRasebotja noSesane, iPirates inoRelebohile Mofokeng, Tapelo Xoki noDeano van Rooyen abaliimele.
AmaBhakabhaka ahlule iSiwele FC emzuliswaneni wokuqala ukuze afinyelele kowesibili kwiCarling Knockout.
Ngakolunye uhlangothi iDikwena tsa Meetse isasemkhankasweni wokuvikela isicoco sayo njengoba iqhelukise AmaZulu endleleni yawo emzuliswaneni wokuqala – iwashaya ngo 3-2.
FUNDA NALA | Uyidonsa ngamazinyo ingubo uYeye eBotswana
Njengoba kuyiyo iMagesi eyamangaza futhi yahlaza i-Orlando Pirates ngokuyibhulisa amazolo kulo mqhudelwano ngonyaka odlule, kubhekwe umdlalo oshisayo.
Ngokusobala, lona kuzoba wumdlalo wokuziphindiselela. Futhi njengoba iPirates isikhishiwe kwiChampions League, le ndebe iyithuba layo lokusula abalandeli izinyembezi.
