IPirates idlale ngokulingana kowokuqala eSpain

I-Orlando Pirates iqale uhambo lwayo lwaseSpain ngokudlala ngokulingana ngo 1-1 neCórdoba FC yaseSpain emdlalweni wobungani ngoLwesithathu ebusuku.

UBoitumelo Radiopane ushaye igoli lokulinganisa ngemuva kokuba iqembu laseSpain lihambe phambili esiwombeni sesibili.

Umqeqeshi u-Abdeslam Ouaddou uqale umdlalo enikeza abadlali abasha uGhampani Lungu, osuka kwiSiwelele FC, noSbangani Zulu osuka kwiRichards Bay, nosuka kweleDDc uMpho Padime ithuba. 

Uphinde waqala nangoSiyabonga Dladla epalini esikhundleni sikaSipho Chaine.

ICórdoba ibe namathuba amaningi okushaya amagoli ekuqaleni komdlalo, kodwa abadlali bayo behluleka ukuwasebenzisa. 

Ngakolunye uhlangothi, uPatrick Maswanganyi no-Abdoulaye Mariko nabo bazamile, kodwa kwaphela isiwombe sokuqala kungenagoli.

I-Orlando Pirates isiqale kahle isiwombe sesibili ngemva kokungena kukaBohlale Ngwato noNeo Rapoo. 

USbangani Zulu ucishe washaya igoli ngomzuzu ka-59, kodwa ibhola lakhe lakhishwa seliyokweqa umugqa.

U-Ouaddou wenze izinguquko eziningi ngomzuzu ka-63, kwabuya nesitobha esinamava uThapelo Xoki obesehlale isikhathi eside engadlali ngenxa yokulimala.

• FUNDA NALA | OweSekhukhune uveza umehluko kaKaze

ICórdoba igcine ishaya igoli ngomzuzu ka-68 ngoJavi Antras, kodwa uRadiopane walinganisa sekusele imizuzu engu-15, esebenzisa iphutha likanozinti.

I-Orlanod Pirates manje isizobhekana neCádiz CF emdlalweni wayo wesibili wobungani ngoMgqibelo.

• EZISHISAYO| Cofa lapha usithole kuWhatsApp