UFiston Mayele uya kwiChiefs? Uyaziphendulela ngalokhu
Umgadli wePyramids, uFiston Mayele, wenqabile ukwanda ngezinkulumo ezimkhomba kwiKaizer Chiefs – okwamanje.
Uthi yena ugxile ngokugcwele emdlalweni wamanqamu weCaf Champions League.
IPyramids izobhekana neMamelodi Sundowns eLoftus Versfeld ePitoli emlenzeni wokuqala ngoMgqibelo.
UFiston Mayele ubemataniswa neKaizer Chiefs ekuqaleni kwesizini ngemuva kokunconywa ngumqeqeshi uNasreddine Nabi.
Laba bobabili bake basebenza ndawonye kwizinkunzi zaseTanzania iYoung Africans.
UNabi uthathe izintambo kwiKaizer Chiefs ekuqaleni kwesizini ka-2024/25.
NgoDisemba, uFiston Mayele ukuqinisekisile ukuthi uke waxoxa noNabi mayelana nokufudukela eNingizimu Afrika.
“Yebo, kuyiqiniso,” uphendule kanje uMayele ekhuluma neKickOff.com esikhungweni la iPyramids izilungisellea khona lo mdlali ePitoli.
“Umqeqeshi uNabi wangithinta ngoDisemba, kodwa lesi akusona isikhathi sokukhuluma ngalokho.
“Ngigxile ngokugcwele emdlalweni wamanqamu weCaf Champions League,” kusho lo mgadli waseCongo.
“Ngifuna ukuqeda isizini ngegiya eliphezulu, futhi yilokho kuphela engicabanga ngakho njengamanje.”
UFiston Mayele ubambe iqhaza elikhulu ohambweni lwePyramids oluya kowamanqamu.
Nguye oshaye igoli elibalulekile bedlala ne-Orlando Pirates emzuliswaneni odlule.
Lelo goli lisize iPyramids ukuthi ibekise indawo yayokowamanqamu weChampions League okokuqala ngqa.
“Ngiyajabula ukuba lapha,” kuqhuba uMayele. “Ngifuna nje ukusiza iqembu ukuthi liwine lesi sicoco.
“Kungokokuqala ngqa ikilabhu ikowamanqamu weChampions League, futhi ngiyaziqhenya ngokuba yingxenye yalokho.
“Angikwazi ukuthembisa igoli, kodwa ngifuna ukufaka isandla futhi ngiqinisekise ukuthi sidlala kahle,” kwengeza yena.
UMayele kulindeleke ukuthi ahole ukuhlasela kwePyramids uma isibhekene neSundowns ngoMgqibelo.
Usevele ukufakazele ukuthi uyakwazi ukumelana nengcindezi yemidlalo emikhulu kulo mqhudelwano wamakilabhu aphezulu e-Afrika.
Okwamanje, inkulumo yokujoyina kwakhe iChiefs isamisiwe njengoba lo mgadli egxile emsebenzini ozayo.
