ISundowns ibuyisa owazakhela igama kwiStellies
I-Mamelodi Sundowns kubikwa ukuthi isiseduze nokuqedela ukusayinisa kwayo kokuqala okukhulu ngaphambi kwesizini entsha.
Kuvela ukuthi seyivumelene neqembu lase-Austria iSV Ried ngokudayiselwa umdlali wasophondweni ozalwa kuleli u-Antonio van Wyk.
AMasandawana usenesikhathi eside ulandela lo mdlali owagqama kwiStellenbosch FC ngaphambi kokuthuthela phesheya.
Futhi manje kubonakala sengathi sekusele izinyathelo ezimbalwa kuphela ngaphambi kokuthi agqoke imibala ephuzi neluhlaza.
Ngokwemibiko, i-Mamelodi Sundowns neSV Ried sebevumelene ngemali yokudayiselana lo mdlali.
Lo mdlali oneminyaka engu-24 ubudala kubikwa ukuthi useqedile nokuhlolwa kwezempilo.
Kuvela nokuthi naye uselangazelela ukujoyina labo mpetha beCaf Champions League ngesizini ezayo.
UVan Wyk washiya iStellenbosch ngoSepthemba ka-2024 waya e-Austria ngemuva kokuzakhela igama njengomunye wabadlali abavelele kuleli qembu laseWinelands.
Ngesikhathi ekwiStellenbosch, wadlala imidlalo engu-77 futhi wasiza iqembu ukunqoba iCarling Knockout ngo-2023.
Uphinde wamelwa yiNingizimu Afrika emiqhudelwaneni yeCosafa Cup.
Ukuya kwakhe eSV Ried kwaphumelela njengoba esize leli qembu ukuthi likhuphukele esigabeni esiphezulu sebhola lase-Austria.
Manje, ngaphansi kweminyaka emibili selokhu ahamba eNingizimu Afrika, kubonakala sengathi usezobuya ekhaya.
I-Mamelodi Sundowns seyilungisa amathizethize ngaphambi kokuqedela ukusayinwa kwakhe bese eyethulwa kubalandeli.
