IKruger nowodumo kwiPirates iqinisela iligi enkulu

I-Kruger United esanda kukhushulelwa kwiBetway Premiership isiqalile ukuqinisa iqembu layo ngabadlali abanamva.

Isisayine umdlali oseke wagijima emaqenjini amaningi esigabeni esiphezulu uKwanda Mngonyama noKatlego Mohamme.

Laba badlali basemuva bavumelene ngokujoyina iqembu laseMpumalanga njengoba umqeqeshi u-Abram Mongoya eqhubeka nokwakha iqembu elizokwazi ukuncintisana esigabeni esiphezulu okokuqala emlandweni walo.

UMngonyama ufika ngemuva kokudlalela iqembu laseBahrain i-El Ettihad izinyanga eziyisishiyagalombili. 

Lo mdlali oneminyaka engu-32 ubudala useke wadlalela iMamelodi Sundowns, i-Orlando Pirates, iCape Town City, iMaritzburg United naMaZulu FC.

Ngakolunye uhlangothi, uMohamme ujoyina esuka kwiSekhukhune United, lapho adlale khona ngesizini edlule. 

Waqala ngokujoyina iSekhukhune ebolekiswe yiMamelodi Sundowns ngaphambi kokusayina inkontileka ephelele. 

Useke wadlalela ne-University of Pretoria nasePortugal phambilini.

Laba badlali bangabanye abasanda kusayiniswa yi-Kruger United ngemuva kokunyukela kwiPremiership ngokunqoba iMotsepe Foundation Championship.

Iqembu liphinde lasayinisa umdlali wasophikweni uMlungisi Zwane osuka kwiCasric Stars ngenkontileka yeminyaka emibili.

• FUNDA NALA | Usexoshiwe kwiRaja uMzoughi

Abanye abasanda kufika kubalwa uLindokuhle Mtshali, uGeorge Lata, uDouglas Mapfumo, uSifundo Sibanyoni, uKgopotso Mkhonza, uNtsako Makhubela noSipho Sibiya. 

UVicky Mkhawane yena uzoqhubeka kwi-Kruger United ngokubolekiswa yiKaizer Chiefs.

• EZISHISAYO| Cofa lapha usithole kuWhatsApp