IKaizer Chiefs emzamweni wokusayina oweBafana
Iyaqina imizamo ye-Kaizer Chiefs yokubuyisela ekhaya omunye wabadlali abanegama baseNingizimu Afrika abadlala phesheya kwezilwandle.
Leli qembu leNaturena selivele likwazile ukuthola uNjabulo Blom elimboleke eqenjini lakhe le-US Major League ngoJuni.
Nasewindini lokudayiselana ngabadlali ngoJanuwari, iKaizer Chiefs ikwazile ukulanda uThabo Cele obesenesikhathi eside edlala e-Europe.
Manje, ngombiko weSNL24.com, Amakhosi asebheke ukubuyisa uSiphephelo “Yaya” Sithole.
- SITHOLE KU-FACEBOOK | Cofa la, Lisenethini.co.za
Lo mdlali wasesiswini weBafana Bafana njengamanje udlalela iqembu lasePortugal elidlala esigabeni sesibili, iGil Vicente.
Kukholakala ukuthi usekulungele ukubuyela ekhaya, kanti i-Kaizer Chiefs isisheshe yasiveza isifiso sayo sokuthi ajoyine yona.
“Umqeqeshi usebonile ukuthi ukusayinisa abadlali bamaqembu ayizimbangi kuleli kunzima kakhulu,” kucashunwe umthombo usho kanje.
“Yingakho befuna ukubona ukuthi abakwazi yini ukuthola abadlali baseNingizimu Afrika abadlala ngaphandle.
“Ikilabhuu isazozama ukuthola abadlali ebadingayo emaqenjini, kodwa uma lokho kwehluleka, izophumela ngaphandle kwezwe.
“Futhi yingakho seyiphinde yavuselela intshisekelo yayo ku-Yaya. Ubuyele ohlwini lwabadlali ebafunayo.”
Umthombo uphinde waveza ukuthi ithimba labaqeqeshi kule kilabhu likholelwa ekutheni uSithole angakwazi ukusebenzisana kahle nabadlali babo basesiswini maphakathi nenkundla.
“Yingakho sebebheke ukumlanda kusemanje nje,” kwengeza lo mthombo.
I-Kaizer Chiefs ivele inoSibongiseni “Ox” Mthethwa, Thabo Cele, Edson Castillo, Njabulo Blom noYusuf Maart esiswini maphakathi nenkundla.
- FUNDA NALA | Uyigadla ‘ngezintwana’ iSuperSport uJose Riveiro
Kuvele ukuthi uma imthola uSithole, ozakhele igama ngebhola elihle alidlale kwiBafana ngoJanuwari kwiCaf Africa Cup of Nations (Afcon), kukhona ezobadedela.
Kuvele ke kunamahlebezi okuthi oMthethwa noCastillo bengase bakhululwe uma kuphela le sizini njengoba iNasreddine Nabi engababoni beyingxenye yeqembu lakhe ukuya phambili.
- ZITHOLE ZISHISA | Cofa la, ujoyine iWhatsApp Group yethu
