I-Arrows isikhombe abadlali ababili abanamava indlela

Kuvela ukuthi iGolden Arrows isishise izembe kubadlali asebenesikhathi eside bekuleli qembu, oKnox Mutizwa noThabani Zuke.

UMutizwa ujoyine i-Arrows unomphela ngesizini ka-2017/18 ngemuva kokufika ebolekiswe yiBidvest Wits.

Uqale ukufika eNingizimu Afrika ngo-2016 esuka eqenjini laseZimbabwe iHighlanders.

Kumasizini ayisishiyagalombili, ushaye amagoli angu-63 futhi emidlalweni engu-231 kwi-Arrows.

Kule sizini uMutizwa ubesadlale imidlalo engu-14, washaya amagoli amathathu kuphela.

UZuke ubeyingxenye yeqembu elikhulu kwi-Arrows kusukela ngo-2019. 

Ukhushulelwe eqenjini elikhulu ngemuva kokusiza iqembu lenkulisa lale kilabhu ukuthi liwine iDStv Diski Challenge ngo-2018.

Lo mdlali wasesiswini oneminyaka engu-26 ubudala udlale imidlalo engu-93, washaya igoli elilodwa.

Kule sizini, ubonakale emidlalweni engu-12 kuyo yonke imiqhudelwano.

Ngokubika kweFARPost, bobabili kuthiwa bakhululwe ngokushesha, futhi ngeke baphinde babe yingxenye yeqembu kusuka manje.

Ukuxoshwa kukaZuke kusolwa ukuthi kungenxa yokuthi usayine inkontileka yesibambiso naMaZulu FC, ayizimbangi ezinkulu ze-Arrows.

UMutizwa yena ugxalwe ngenxa “yokungenzi kahle” nezinye izizathu ezingadalulwanga.

Leli qembu elizinze eThekwini lixosha laba nje livele lisanda kuqinisa ngenqwaba yabadlali. 

Ngemuva kokunqanyulwa kobulungu beRoyal AM kwiPSL, i-Arrows izixebulele umkhoma, yalanda abadlali abambalwa abebekuyo.

• FUNDA NALA | IDurban City ivuke ngeNgwenya, u-‘CR7’ 

Kulaba kukhona u-Ayanda Jiyane, uXolani Ngcobo, uSiphesihle Msomi, uThabo Matlaba, uPhilani Sithebe, uShadrack Kobedi, uSabelo Sithole, no-Ayabulela Maxwele.

• SIBAMBE NAKU-FACEBOOK | Lisenethini.co.za 

Nokho uMutizwa noZuke bebeyingxenye ebalulekile yeqembu ngaphansi kwabaqeqeshi abaningi abehlukene ngesikhathi sabo kuBafana Bes’thende.