UDlangalala uxwayisa ngenkinga elenga phezu kweBafana
Umhlaziyi webhola laseNingizimu Afrika, u-Zipho Dlangalala, usephakamise inkinga enkulu engase ibhekane nomqeqeshi omusha we-Bafana Bafana, uPitso Mosimane.
UMosimane uqinisekiswe njengomqeqeshi omusha weBafana ngoLwesibili.
Lokhu kuqede amasonto amaningi okungaqiniseki ngokuthi ubani ozothatha lesi sikhundla.
Nokho, uDlangalala uthi iBafana ingase ibhekane nenkinga enkulu yonozinti eminyakeni ezayo.
Uthi kukhona ukushoda okukhulu konozinti baseNingizimu Afrika emaqenjini asezingeni eliphezulu.
UDlangalala uthi lokhu kufanele kube yinto ekhathaza kakhulu, futhi esukunyelwa ngokushesha.
“Ingabe kunenkinga yonozinti eNingizimu Afrika?” kubuza uDlangalala engxoxweni ekhethekile neLisenethini.
Uveze ukuthi uRonwen Williams uneminyaka engu-34 kumanje, okungenzeka abuye awabeke ethala amakhokho maduze.
“Ronwen Willimans uneminyaka engu 34… URicardo Goss yena uneminyaka engu-32.
“USipho Chaine uzobe ehlanganisa iminyaka engu-30 ngoDisemba 2026,” kusho uDlangalala.
Lokhu sekuphakamisa umbuzo wokuthi ngubani ozolandela laba nozinti uma sebeshiya njengoba bengekho onozinti abadlalayo ezingeni eliphezulu njengamanje.
“Pho ubani ozolandela bona, uzoqhamuka kuphi futhi abe namaphi amava?” kubuza uDlangalala.
Uphinde waveza ukuthi amakilabhu eBetway Premiership amaningi anozinti abangebona abaseNingizimu Afrika emaqenjini awo.
Uhlu lwamaqembu anezinti bakwamanye amazwe luhlanganisa: AmaZulu, Chippa United, Durban City, Golden Arrows, Kruger United (babili), Mamelodi Sundowns (babili), Marumo Gallants (babili), Orlando Pirates, Polokwane City, Richards Bay (babili), Sekhukhune United (babili), Siwelele neTS Galaxy.
U-Zipho Dlangalala uthi lesi simo singaba yinkinga kuMosimane njengoba i-Bafana Bafana ibheke isiqalo esizokwakhela ikusasa.
Ufisa ukubona kuvela isizukulwane esisha sonozinti basekhaya abazokwazi ukuthatha izintambo kuWilliams.
Uthi kufanele kuqalwe manje ukulungiselela iNdebe yoMhlaba ka-2030.
“INdebe yoMhlaba ka-2026 isidlulile. Elandelayo izoba ngo-2030,” kusho uDlangalala.
“Lokho kusho ukuthi kusele iminyaka emine kuphela.”
Nokho, usanethemba lokuthi izinto zingashintsha.
- FUNDA NALA | UMosimane uphendula ngokugxekwa uBroos
Uthi njengoba iwindi lokushintshana ngabadlali lisavuliwe, amaqembu asengakwazi ukwenza izinguquko.
“Kepha njengoba iwindi lokudayiselana ngabadlali lisavuliwe, kusekhona ithuba lokuthi izinto zishintshe,” kusho yena ngethemba.
- EZISHISAYO| Cofa lapha usithole kuWhatsApp
