Esinye isithiyo kweyokuhlungela ukungena kwiPremiership
Kukhona esinye isivunguvungu esingase siphinde siphazamise ukuqala kwemidlalo yokuhlunga yePSL.
ICape Town City isifake icala ngokusemthethweni kwiPSL mayelana nomdlalo oqalwe kabusha phakathi kweSuperSport United neGolden Arrows.
Lowo mdlalo wayekwa phakathi ngoFebhuwari 23 ngenxa yokungasebenzi kwezibani eLucas Moripe Stadium.
Uze waqedelwa ngoMeyi, sekudlule izinyanga ezimbili ngemuva kokumiswa kwawo. ICape Town City ithi lokhu kuphambene nemithetho yePSL.
Icaphune i-Article 14.16, ethi umdlalo kumele uqalwe kabusha kungakapheli amahora angu-48 umisiwe.
Usihlalo weCity uJohn Comitis uthi le nhlangano eyengamele ibhola elikhokhelayo kuleli yephule imithetho yayo.
Ugcizelela ukuthi umphumela walo mdlalo – owaphela zibambene ngo 1-1 – kumele uthathwe njengongekho emthethweni.
Lesi sikhalazo singashintsha yonke into. Uma iPSL ivumelana neCape Town City, umphumela walowo mdlalo ungase uchithwe.
Lowo mphumela udlala indima enkulu ekumeni kwelogi njengamanje. Ukulalelwa kwecala kulindeleke ukuthi kukhiphe isinqumo esingujuqu.
Kungase kube nomthelela ekutheni ubani ozodlala kweyokuhlunga — nokuthi ubani ohlala esigabeni esiphezulu.
I-PSL iziqinisekisile izinsuku zale midlalo ngoLwesithathu, kodwa ngenxa yecala lakamuva leCape Town City, zingashintshwa.
Imidlalo yokuhlunga kudingeke ukuthi ibambezeleke njengoba iqembu elinqobe iMotsepe Foundation Championship bebengakaqinisekiswa.
IDurban City, enqobe isicoco, ibhekane namacala amabili okusebenzisa umdlali obhaliswe ngendlela engafanele.
Kodwa umxazululi weSafa ukhiphe isinqumo esivuna yona, okusho ukuthi isingompetha futhi imidlalo yokuhlunga ingaqhubeka.
Kodwa manje sekukhona esinye isithiyo esingase sibambezele le midlalo, nezinhlelo zePSL.
