Abe-Orlando Pirates, Chiefs neSundowns badle izindondo zePSL
Kukhonye amaqembu amathathu ahamba phambili kuleli – iMamelodi Sundowns, i-Orlando Pirates, neKaizer Chiefs – emiklomelweni yanyanga zonke yeBetway Premiership.
Abawinile bahlonzwe yithimba elizimele lezintatheli nabasakazi abagunyazwe ukusebenza ngaphansi kwePSL.
UMQEQESHI WENYANGA
UMiguel Cardoso weMamelodi Sundowns nguye odle lo mklomelo ngemuva kokwenza kahle ngoJanuwari noFebhuwari.
Emidlalweni emine ayidlale kulesi sikhathi, uCardoso uyinqobe yonke, okwenze iSundowns yalivala igebe ebisele ngalo kwiPirates.
Okugqamile ngalesi sikhathi kube wukunqoba okukhulu ekuhambeni ebhekene nezimbangi ezinkulu zesicoco i-Orlando Pirates ngoFebhuwari.
Umbango wale ndondo bewungelula, uCardoso ubeyibanga nalaba:
- U-Abdeslam Ouaddou (wePirates): Ukwazile ukugcina umgqigqo, iPirates yaqhubeka nokuzihola phambili.
- UGavin Hunt (weStellenbosch FC): Ngokuzinzisa leli qembu laseWinelands alifice lisengozini yezembe.
UMDLALI WENYANGA
URelebohile Mofokeng we-Orlando Pirates nguye odle le ndondo kulandela ukubuyelwa kwakhe wumgqigqo wakhe omenze umdlali ophambili.
Ube nomthelela omkhulu kwiPirates ngoJanuwari nangoFebhuwari, esiza leli qembu liqhubeke nokuqhwakela.
Ngemuva kokulwa ebuyela eqenjini eliqala imidlalo, uMofokeng ube yisisekelo sokuhlasela kwePirates.
Izibalo zakhe ngalesi sikhathi sezinyanga ezimbili zikhombise ubukhali bakhe uma kuhlaselwa:
- Imidlalo: Udlale imidlalo eyisithupha
- Amagoli: Ushaye amagoli amathathu, wakha amanye amathathu
- Ukuvelela: Unqobe izindondo ezithathu zoMdlali oVelele emidlalweni emitahthu kulandelana.
IGOLI YENYANGA
Lo mklomelo udliwe uGlody Lilepo weKaizer Chiefs okuletha inhlansi yethemba esikhathi esimnyaka kuleli qembu laseNaturena.
ULilepo unikwe lo mklomelo ngegoli lakhe elihle alishaya bebhekene neMarumo Gallants eDr. Molemela Stadium ngoJanuwari.
FUNDA NALA | UMcCarthy ubhoboka ngesithembiso esingafezwanga kuMaZulu
Umbango weSundowns ne-Orlando Pirates ubonakala uqhubeka nasezindondweni njengoba kunjalo nasembangweni wesicoco seligi.
Umklomelo kaLilepo wona kuzothenjwa ukuthi uzonika iKaizer Chiefs umfutho ewudingayo njengoba izinto ziyibhimbela muva nje.
