UWilliams ubhoboka ngomlayezo kaMofokeng ombuyisele uthando lwebhola
Ukaputeni weBafana Bafana, uRonwen Williams usephawule ngomlayezo owamviselela awuthunyelelwa uRelebohile Mofokeng ngesikhathi elimele.
Kuke kwanesikhathi esijana uWilliams engadlali eqenjini lake lakhe, iMamelodi Sundowns futhi kungacaciswa kahle ukuthi kwenzekani ngaye.
Okwashiwo nje wukuthi ulimele, kodwa kwangacaca ukuthi kangakanani nokuthi kuzothatha isikhathi esingakanani ukuthi alulame.
Ekhathazekile ngokaputeni wakhe eqenjini lesizwe, uRelebohile Mofokeng wathumelela uRonwen Williams umlayezo embuza ngokuthi kwenzakalani.
Lokhu kuvezwe uRonwen Williams ngesikhathi ekhuluma nabezindaba ngaphambi komdlalo weBafana neLesotho.
Lamaqembu azogadulisana emdlalweni wokuhlungela iNdebe yoMhlaba ePeter Mokaba Stadium ngoLwesihlanu ngo-6 ntambama.
UWilliams welulame ngesikhathi esifanele njengoba ubuholi bakhe budingeka kule midlalo ebalulekile yokuhlungela iNdebe yoMhlaba.
Ekhuluma ngesikhathi athi simvuselele uthando lokudlala ngesikhathi elimele, uthi umlayezo kaMofokeng wamkhuthaza kakhulu.
“Uyazi, ukuthola umlayezo ovela kuRele Mofokeng kubo bonke abantu…
“Wangithumelela umlayezo ethi: ‘Kaputeni, kwenzakalani?’. Kwangijabulisa kakhulu.
“Ngazizwa ngenye indlela ngibona yena engithumelela umlayezo njengoba amaqembu ethu abezobhekana esikhathini esingangesonto.
“Kwangivuselela kakhulu impela, ukumhuluma iqiniso nje,” kuchaza uRonwen Williams.
Sekungumlando ke ukuthi uRele Mofokeng ushaye amagoli amabili asheshayo kuWilliams emdlalweni we-Orlando Pirates neMamelodi Sundowns ngempelasonto edlule.
Kodwa manje laba bobabili baseqenjini elilodwa futhi kubhekwe babe nomthelela omkhulu kulo njengoba kumele liyinqobe yomibili imidlalo neLesotho neBenin.
“Ukulimala kunginike ithuba lokuvuseleleka kabusha. Kunginike isikhathi sokuhlala ngike ngibuke nami kudlalwa.
“Ngethemba ukuthi ngizoba nomdlandla omkhulu njengoba kuyiwa enkathini ebalulekile ngokweqembu nangokwelesizwe.
“Ngijabule futhi sengiyibheke ngabomvu imidlalo emikhulu ezayo,” kuchaza uWilliams ngokulimala kwakhe.
