UZwane uveza okwenza kubolekiswe ngaboSuthu
U-Arthur Zwane ongumqeqeshi waMaZulu FC usechaze isizathu sokubolekisa ngabanye babadlali, egcizelela isidingo sokuthi babuye sebengcono.
Imibiko iveza ukuthi umgadli uSenzo “Mbhobho” Ndlovu uzilolonga neDurban City emhlolayo ngenhloso yokumboleka.
Lo mdlali oneminyaka engu-28 ubudala ujoyine AmaZulu kule sizini ngemuva kokuhlohla amagoli angu-23 kwiSinenkani FC.
Wenze kahle kakhulu kuleli qembu elidlala kwi-ABC Motsepe League e-Eastern Cape futhi nguye ohambe phambili ngamagoli ngesizini edlule.
Nokho uthwale kanzima ukubamba umgqigqo esigabeni esiphezulu, kanti usadlale imidlalo emithathu kuphela kule sizini.
UZwane ugqamise ukubaluleka kokudlala njalo ekuthuthukisweni kwabadlali.
“Singakwazi ukusebenzisa abadlali abangu-11 kuphela, bese kuba nabasehentshini. Akulungile ukugcina abadlali abangalenzeli lutho iqembu.
“Wonke umuntu uthola ithuba elifanelekile, kodwa kufanele sihlezi sihlola iqembu sibone la lishoda khona,” kusho uZwane.
Uyincomile imizamo kaNdlovu ayenza ejimini kodwa wavuma isidingo sokubolekisa ngaye ukumsiza ukukhula.
“USenzo wenza kahle ejimini. Kodwa ngaphandle kokudlala njalo, intuthuko yakhe ibambezelekile.
“Udinga isikhathi sokudlala ukuze akhe ukuzethemba,” kwengeza uZwane.
AmaZulu aphinde abolekisa ngomdlali wasemuva uYanga Mjoli nomgadli uSede Junior kwiMarumo Gallants.
