UZungu ubhoboka ngokwamvimba ukuya kwi-Orlando Pirates
USandile Zungu – ongumengameli waMaZulu FC – useveze ukuthi wake waba nezingxoxo nosihlalo we-Orlando Pirates u-Irvin Khoza ngokujoyina le kilabhu.
Lokhu kwenzeka ngaphambi kokuthi athenge AmaZulu FC asemkankasweni wokuwenza iqembu elikhulu ebholeni lakuleli nase-Afrika yonkana.
USandile Zungu uveze lokhu engxoxweni nabe-In the Know Podcast muva nje, la abevuleleka khona ngempilo yakhe.
“Umbuzo obalulekile impela lowo,” kusho uZungu ngesikhathi ebuzwa ukuthi ngabe AmaZulu wawathengiswa wukuthi wayengumlandeli wawo yini.
“Mina ngikhule ngingumlandeli wePirates. Ngisanda kukhunjuzwa uMpumi Khoza nje ngalokhu.
WAYEHEHWA UKHOZA NGESIKHUNDLA
“Ungikhumbuze ukuthi uyise wamtshela ukuthi wake wafuna ukungifaka ebuholini be-Orlando Pirates ngibe isekela likasihlalo.
“Impela kwenzeka lokho. Saba nazo izingxoxo kodwa bezingakayi ndawo ngesikhathi kuvela ithuba lokuthenga AmaZulu.
“Namanje i-Orlando Pirates isenendawo enhliziyweni yami. Yilona qembu engikhule ngilithanda.
“Kodwa manje uthando lwami selukuMaZulu. Ayikilabhu yebhola endala kunawo wonke kwiPSL.”
AMAZULU FC MADALA!
Ube esechaza kahle umlando waMaZulu nokuthi kungani efuna ukuwavuselela agcine eyiqembu elikhulu.
“AmaZulu asungulwa ngo-1932 ngakho ayifa eliyigugu. Ngesikhathi esingulwa, kwakukhona amanye amaqembu ayebusa eKZN ngaleso sikhathi.
“KwakuyiBush Bucks – amathol’amnyama, eyayibuye abizwe ngamaMpondo ngoba yayinabalandeli abaningi eNingizimu yogu.
“Kwakukhona ne-African Wanderers – abaqulusi – abafana bamaphakathi nesifundazwe.
“Ngesikhathi esungulwa (AmaZulu) athola isibusiso senkosi eyayibusa ngaleso sikhathi iSilo uSolomon kaDinuzulu.”
AWASENDLUNKULU
Uthe inkosi uSolomon yabe seyithi leli qembu kumele kube ngelasoNdlunkulu kaZulu.
“Kunesigodlo esiseThekwini okuthiwa kuseMbelebeleni. Ngakho uma ngithenga le kilabhu ngangazi ukuthi ngeke ngizwazi ukuyishintsha igama.
“Ngathenga ifa elabusiswa ngababekhona phambilini. Mina engakunikwa yithuba lokugcina lelifa.”
FUNDA NALA | Kugwetshwe owayedlala kwiChiefs ngelezidakamizwa
UZungu uzibophezele ekutheni kushaye u-2032 Usuthu lube selufike ezingeni lokubusa hhayi ebholeni lakuleli nje kuphela, kodwa nasezwenikazi.
