UXola Mlambo uhlabe wahlikiza ‘ipokloza’ lomqeqeshi
Umdlali owayeyintandokazi yezihlwele kwi-Orlando Pirates uXola Mlambo usegxeke umqeqeshi wakhe wakudala kwiTS Galaxy uSead Ramovic, wathi yipokloza nje.
UXola Mlambo ubekhuluma kwiSports Nights Amplified With Andile kuMetro FM lapho ebuzwe khona ngoRamovic.
Lokhu kwenzeke ngemuva kokuthi iCR Belouizdad kaRamovic ihlulwe yiMC Alger kaTulani Mokwena ngesonto eledlule.
“Akukhona ukuthi angimthandi… Kodwa kumayelana nemigomo,” kusho uMlambo.
“Uma ubungabeka uRulani noSead lapha, ngingakhetha uRulani noma ngaluphi usuku ngoba uhlakaniphile futhi unobuchwepheshe. Uhlela futhi enze izinto kahle…
“Angithandi ukukhuluma ngabaqeqeshi kodwa isigameko esisodwa engingakutshela ngaso kwaba ngesinye isikhathi sisegunjini lokushintshela noSead.
“Kwakuyisikhathini sekhefu futhi iqembu lingaphansi kwengcindezi, okuwukuphela kwento asitshela yona ukuthi, ‘zinsizwa, sisenemizuzu engu-45’.
“Kuthini lokho? Kukutshela ngekhwalithi yomqeqeshi abenguye,” kwengeza uXola Mlambo.
Ube esetshela ukuthi uRamovic useke wachazwa njengomqeqeshi wesimanje, owaziyo umsebenzi wakhe futhi owaqonda kahle amacebo okudlala.
“Ngasebenza ngaphansi kwakhe… Kunesikhathi esabona ngaso ukuthi izinto esizenza ejimini usuke ezithole kuGoogle. Sake senza into eyayikade yenziwe yi-Arsenal.
“Sasala sibuzana ukutho, ‘siyibonile le nto yokuletha izipikha nokudlala umculo. Kanti yena uzoziqhamukela nini nokwakhe’.
“Ngaphambi kwemidlalo into ebesitshela yona wukuthi, ‘zinsizwa sinemizuzu engu-90, uma singangenelwa goli ngeke sihlulwe’.
“Yilokho kuphela ayekusho. Ukuthi nje njengabadlali bebhola siyesaba ukukhuluma iqiniso ngoba abanye abantu bangase bakuzonde.
“Kodwa kimina kulungile ukuzondelwa ukukhuluma iqiniso. Sasidlala sazi ukuthi lezo yizingxoxo ebesinazo.
“Kwesinye isikhathi usihlalo (uTim Sukazi) kwakudingeka angenelele akhulume nomdlali ngamunye,” kusho uMlambo.
Uthe uke wasebenza nabaqeqeshi abanekhono phambilini abafana noTed Dumitru noRulani Mokwena abaziyo ukuthi benzani.
UXola Mlambo wengeze ngokuthi uRamovic – onelayisensi edume kakhulu i-Uefa A Coaching License akazi lutho ngokwamaqhinga.
FUNDA NALA | UDe Reuck angase ashiye kwelaseTanzania
“Ngashaqeka ngokuthi umuntu oneziqu eziphakeme kangaka zokuqeqesha wayenza futhi asho izinto ngendlela ayenza ngayo.”
ZITHOLE ZISHISA: Cofa lapha usithole kwiWhatsApp Channel yethu
