Uvumbuke kwelinye iqembu ‘uZulu wePirates’
– Intatheli yeLisenethini
UVeluyeke Zulu, obengumdlali wasemuva kuMaZulu FC, obekuthiwa uhambe ne-Orlnado Pirates ohambweni lwayo lwaseSpain, usesayine nelinye lamaqembu amasha kwiDStv Premiership.
Ngesikhathi i-Orlando Pirates ishicilela amagama abadlali abebezobhekana nePlymouth Argyle emdlalweni wokuzwana amandla ngempelasonto edlule, bekunabadlali ababili abanesibongo sakwaZulu.
Kungaleso sikhathi kuqubuke izinsolo zokuthi omunye wabo nguVeluyeke Zulu obesanda kukhululwa kuMaZulu.
Omunye wabo kuvele ukuthi nguBayanda Zulu, ongunozinti osemncane osayiniswe eqenjini eligijima kwiKZN ABC Motsepe, iMidlands Academy.
Nakuba lo omunye umdlali onesibongo sakwaZulu kwiPirates engakaziwa, sekucacile ukuthi akukaze kube uVeluyeke.
I-FARPost ibika ukuthi uVeluyeke, omeninyaka engu-29, usejoyine iMarumo Gallants ngemuva kwamasonto ezilolonga neqembu leMotsepe Foundation Championship iBaroka FC.
UZulu ubejoyine AmaZulu, aqeqeshwa uPablo Franco ngoJulayi ka-2022 kulandela ukudlala kahle kwakhe kwiChippa United.
KwiChilli Boys, udlale imidlalo engu-27 washaya amagoli amabili. KuMaZulu udlale engu-18 nje kuphela.
Ngokwalo mbiko, uZulu ujoyine iBahlabane baNtwa ngenkontileka yonyaka enombandela yokwelula ngenye isizini.
OLUNYE UDABA: ISuperSport isihlome ngobekwiPirates, isazingela abeDowns
UZulu ungomunye wabadlali asebedlale emaqenjini ehlukene okubalwa kuwo iMaritzburg United, iRoyal Eagles, iGolden Arrows neRichards Bay FC.
