UTshepang Moremi ‘usephahlukile’ ngokujoyina iPirates

UTshepang Moremi usejabulise abalandeli be-Orlando Pirates ‘eqinisekisa’ ngezindlela eziphansi ukuthi usengudlali waleli qembu.

Ngesonto elidlule, iLisenethini ibike ukuthi uTshepang Moremi usesayinile kwi-Orlando Pirates kodwa welulekwa ukuthi angayithi vu leyo.

Lokhu kungenxa yokuthi iPirates ifuna ukuzenzela ezayo izimemezelo ngabadlali abasha ebasayinisile. 

Umthombo usitshele ukuthi uMoremi usevele uvalelisile kozakwabo nakubantu abesondelene nabo eThekwini.

“Uze wayobonga labo abamletha kuMaZulu okubalwa no-Ayanda Mkhize ongunguye owamhlonza,” kusho umthombo.

“Kodwa wadonswa ngendlebe ukuthi angakusho esidlangalaleni ukuthi usethuthela kwiPirates.” 

Kodwa manje kubonakala sengathi injabulo yokudlalela iqembu akhule engumlandeli walo imehlulile uMoremi, waphahluka.

Ezinkundleni zokuxhumana ngoLwesihlanu, uTshepang Moremi ususe ukukhuluma ngesikhathi efaka isithombe sakhe esidala egqoke iimpahla ze-Orlando Pirates.

Abalandeli beBucs bajabulile, baqala ukudingida ukuthi ngabe lena yindlela yakhe yokuqinisekisa amahlebezi mayelana nokufudukela kwakhe kulezi zikhondlakhondla zaseSoweto.

• FUNDA NALA | Ushaya amakhala ngabalaxazwe yiPirates, bacoshwa yiChiefs

Khonamanjalo uTshepang Moremi uzoba ngumdlali wesibili ukujoyina i-Orlando Pirates esuka eqenjini laKwaZulu-Natal.

IPirates kubikwa ukuthi isisayinise nomgadli uYanela Mbuthuma obedlala kwiRichards Bay. 

• SITHOLE NAKU-FACEBOOK | Lisenethini.co.za 

Laba bobabili, nabanye abadlali abayisithupha kubikwa ukuthi bazojoyina iBhakabhaka ngesizini ezayo.

• JOYINA | SineGroup kaWhatsApp

Laba bahlanganisa uSihle Nduli waseStellenbosch, uMasindi Nemtajela waseMarumo Gallants, noKabelo Kgosietsile weBaroka FC.