‘Uthulise’ abamgxekayo uChivaviro iChiefs idla amahlanga
- Sibongiseni GUMBI
Kusuke umthwalo emahlombe omgadli weKaizer Chiefs, uRanga Chivaviro eshaya igoli benqoba ngo 4-0 kwiSuperSport United.
Amakhosi aqhubeke nokukhombisa izimpawu zokuvuka emaqandeni kulo mdlalo wecarling Knockout obusePeter Mokaba Stadium ePolokwane ngoMgqibelo ebusuku.
Akwazile ukumelana nengcindezi abeyifakwa yiSuperSport United ikakhulukazi ngasekuqaleni komdlalo, agcina elithole kuqala igoli.
Leli goli elishaywe uGaston Sirino ngomzuzu ka-33 lehlise ingcindezi kuMakhosi, layibuyisela kwiSuperSport.
Ngasekuqaleni kwesiwombe sesibili, ukaputeni weChiefs uYusuf Maart ushaye elesibili, elenze sehla kakhulu isisindo kwezakhe.
URanga Chivaviro, obesehlulwe amathuba ambalwa wagcina esehhahhanyezwa abalandeli abebefuna ashintshwe, ushaye elesithathu ngomzuzu ka-73.
Uthe uma ejabulela igoli, wenza uphawu lokutshela abalandeli ukuthi abaqhubeke bakhulume phela.
Nokho ozakwabo basheshe bamvimba, uSamkelo Zwane egibela kuye, embamba nezandla.
Igoli lesine lingene sekubalwa amanenjana umdlalo uphele, lishaywa u-Ashley Du Preez.
ISuperSport iqede umdlalo ingasaphelele kulandela ukukhishwa kukaGape Morelo ngekhadi elibomvu sekusele imizuzu eyishumi umdlalo uphele.
Nokho uphume bese kuvele konakele njengoba bese bevele belandela emuva ngo 3-0, futhi sekucacile ukuthi selugobile uphondo ngakubo.
Ukunqoba kweChiefs kusho ukuthi lisaphila ithemba lokuthi ingakwazi ukuqeda indlala yezindebe esiyihaqe iminyaka ecela eshumini.
