UThulani Mabaso weChiefs uveza usuku angasobe alukhohlwa
Umdlali osemncane weKaizer Chiefs, uThulani “Touch” Mabaso uchaze umdlalo wakhe wokuqala kuMakhosi njengesikhathi ayohlezi esikhumbula.
Lokhu kungemuva kokuthi edlale okokuqala eqenjini elikhulu ngoLwesibili beguqisa iGolden Arrows ngo 1–0 emdlalweni weBetway Premiership.
Lo mdlali oneminyaka engu-21 ubudala ungene ngomzuzu ka-74 futhi akachithanga sikhathi, wabe esekhombisa ukuthi kukhona azokwenza.
UMDLALO WAKHE WOKUQALA
UThulani Mabaso ubengukaputeni weKaizer Chiefs ngesikhathi inqoba isicoco seDStv Diski Challenge okokuqala ngesizini edlule.
Manje usefuna ukufika nalowo moya eqenjini elikhu, asebenzele ukubuyisa izinsuku zenjabulo.
“Ukudlalela iChiefs kuyiphupho lawo wonke umuntu,” kusho uMabaso. “Ngesikhathi ngingena enkundleni, ngizitshele ukuthi kumele ngizethembe.
“Empilweni, kwesinye isikhathi uthola ithuba elilodwa kuphela, ngakho-ke kufanele ulisebenzise ngokugcwele.”
OKWENZE USUKU LUBE LUHLE
UMabaso uzalwe futhi wakhulela eSoweto kanti uqale uhambo lwakhe lwebhola kwiMeadowlands Academy.
Ngesikhathi edlala okokuqala eqenjini elikhulu, ayenabo kule nkulisa bebekhona enkundleni bezomeseka.
“Bekukhona ababengabaqeqeshi bami nozakwethu kwiMeadowlands Academy engangikuyo ngineminyaka engaba la ko-12 ubudala,” kuqhuba yena.
“Kube mnandi kakhulu ukubabona. Kungikhumbuza ukuthi ngisukaphi. Lowo mzuzu uzohlala enhliziyweni yami kuze kube phakade.”
IKUSASA
Lokhu kunqoba kwenze iChiefs yanyukela endaweni yesithathu kwilogi yeBetway Premiership, isele ngamaphuzu amabili kwiMamelodi Sundowns eseqhulwini.
Manje sekunenkolelo ekhulayo yokuthi Amakhosi angakhela phezu kwempumelelo yeNedbank Cup yangesizini edlule.
UThulani Mabaso unezifiso ezicacile: “Ngifuna ukuwina izindebe neKaizer Chiefs.
“Leli yikilabhu enkulu neqembu elinqobayo. Abalandeli bethu basebenzisa imali yabo abayisebenze kanzima ukuze beze bazosibuka.
“Sibakweleta ukuthi sizinikele ngakho konke enkundleni. Ngithembisa ukusebenza kanzima ngaso sonke isikhathi ukuze sithole izindebe kule kilabhu.”
FUNDA NALA | UNkota uveza ukuthi wezwa kanjani ukuthi useyashiya kwiPirates
Lo mdlali osemncane angase anikezwe elinye ithuba ngeSonto uma iChiefs isibhekene neZesco United emdlalweni obalulekile kaGroup D weCaf Confederation Cup.
Lona ngumdlalo okumele Amakhosi awunqobe njengoba ungase ucacise ukuthi angakwazi yini ukudlulela esigabeni somkhumulajezi noma cha.
