UTeko Modise weseka uTLB Mbokazi ngokuya e-US
Ukusayina kukaMbekezeli “TLB” Mbokazi kwiChicago Fire kususe izinkulumompikiswano kanti noTeko Modise useveze owakhe umbono ngalokhu.
UMbokazi usayine kuleli qembu elidlala kwi-US Major League Soccer (MLS) ngasekupheleni konyaka odlule esuka kwi-Orlando Pirates.
Ukujoyina kwakhe iqembu lase-US eneligi eyaziwa ngokuheha abadlali asebezothatha umhlalaphansi akwehlanga kahle kwabanye.
Phakathi kwalabo abaveze ukungayizwa kahle le ndaba kaMbokazi ngumqeqeshi weBafana Bafana uHugo Broos.
Lo mqeqeshi wathi lo mnyakazo ngeke umsize uTLB ukuthi akhule ngokwebhola futhi bekumele aye e-Europe okungcono.
Kodwa inkakha yeBafana, uTeko Modise isiveze ukuthi yona iyakuqonda ukuthi kungani uMbekezeli Mbokazi elamukelile ithuba lokuya e-US.
Ekhuluma kwenye yamaPodcast, uthe naye ukube lavela ithuba elinjena wayengeke aliyeke futhi wasiveza isizathu salokho.
“Ukube lavela nakimi leli thuba uMbekezeli Mbokazi alitholile, zwana ngami ngangingeke ngicabange kaningi,” kusho uTeko Modise.
“Uyazi ngobani? Ngoba ekugcineni imali abayitholayo la beya khona iphindaphindwe izikhawu eziyinkulungwane – futhi mhlawumbe eziyishumi lezinkulungwane.
“Noma ngabe malini abebezoyenza ngokudlala kuleli – noma ngabe badlala kuliphi iqembu – ngeke ibakhave uma sebewabeke ethala amakhokho.”
FUNDA NALA | Imenenja icacisa ekaNdah osekhonjwa kwiDowns
UModise njengamanje usesebenza njengomhlaziyi kwiSuperSport TV njengoba esawabeka ethala nje amakhokho.
Uvumile ukuthi nakuye lavela ithuba lokuya phesheya, kodwa lalingafani naleli elitholwe uMbokazi lokuyokwenza imali ebhekile.
