UShabba uvuma iDowns neBucs ngokuvusa iBafana Bafana
– Udaba ngu-Alfred Ngubane
Ingwazi yeKaizer Chiefs neBafana Bafana uSiphiwe Tshabalala uncome u-Irvin Khoza noPatrice Motsepe ngokukhuphula izinga lebhola laseNingizimu Afrika.
Uthe amakilabhu abo, i-Orlando Pirates neMamelodi Sundowns, adlala ibhola elisezingeni eliphezulu kwiBetway Premiership.
UTshabalala ukholwa ukuthi ukudlala kwalamaqembu kwiCaf Champions League kusiza ukwakha abadlali abaqinile abenza umehluko kwiBafana Bafana.
“Abadlali bathola ulwazi ngokuncintisana nabadlali bebhola abaphambili bakwamanye amazwe,” kusho le ngwazi.
Ngokusho kukaTshabalala, i-Orlando Pirates njengamanje iyiqembu elihamba phambili kwiBetway Premiership.
Uthe ilandela ngemuva yiMamelodi Sundowns, iSekhukhune United, neDurban City – akangayibala nhlobo iKaizer Chiefs azakhela kuyo igama.
WINA | Imali yokuqala ibhizinisi lezemfashini neNikNaks
UTshabalala, oyinxusa leBetway Premiership ehambisana noLehlohonolo Majoro, bebeseThekwini bezokwethula umkhankaso weS’bonise And Win.
Lo mkhankaso unxenza abalandeli ukuthi bagqoke imibala yamaqembu abo, bakhombise ukuziqhenya uma behambele imidlalo yeligi.
“Ukuba khona kwabalandeli kunikeza abadlali amandla engeziwe,” kusho uTshabalala. “Uma inkundla ingenabalandlei, kuvele kubande — kube sengathi nidlala ejimini.”
Unxuse abalandeli ukuthi bagcwalise iMoses Mabhida Stadium emdlalweni waMaZulu beDurban City ngoMgqibelo.
FUNDA NALA | UZwane akawuvali ngoKaizer Motaung
Lo mdlalo – obizwa ngeDurban Derby – ngowokuqala phakathi kwalamaqembu kwiligi – uqala ngo-3.30 ntambama.
