UPule Mmodi ufuna iChiefs ivuke nge-Arrows
Umgadli weKaizer Chiefs, uPule Mmodi, usekulungele ukulwa uma sebebhekene neqembu lakhe lakudala iGolden Arrows.
Futhi lo mdlali ohlaselayo usanethemba lokuthi iChiefs ingakwazi ukuthola umphumela obalulekile ekuhambeni ukuze ingaphumi embangweni wokuqeda emaqenjini amane aphezulu.
La maqembu womabili azokhiphana inkani emdlalweni weBetway Premiership eMoses Mabhida Stadium ngoMgqibelo ngo-3.30 ntambama.
Womabili abheke amaphuzu amathathu kulo mdlalo ukuze anonkele aye phezulu kwilogi.
UPule Mmodi uyawavuma amandla e-Arrows kodwa ukholwa ukuthi i-Kaizer Chiefs izoyimela le nselelo futhi iphume ihleka yodwa eMoses Mabhida.
“I-Golden Arrows iyiqembu eliqinile, futhi umqeqeshi wabo omusha uletha ufike nendlela ehlukile.
“Kodwa sigxile ohlelweni lwethu lomdlalo futhi sikholwa wukuthi singawuthola umphumela omuhle,” kusho uMmodi.
-IKaizer Chiefs idonsa kanzima kule sizini, futhi isanqobe owodwa kuphela emidlalweni emihlanu edlule.
UPule Mmodi nokho ugcizelele isidingo sokuba bukhali phambi kwepali ukuze bajike izinto nge-Arrows.
“Sidlala ibhola elihle futhi elihlangene, kodwa kumele siqale ukunqoba imidlalo ngokuthi sisebenzise amathuba okushaya amagoli esiwakhayo.
“Njengomdlali ohlaselayo, ngiyazi ukuthi kumele ngifake isandla kakhulu ngokushaya amagoli,” kwengeza yena.
Okuxakayo ukuthi uMmodi ungomunye wabadlali asebethole ukugxekwa kakhulu kwi-Kaizer Chiefs ngokushweba amathuba alula emidlalweni embalwa edlule.
IGolden Arrows, ehlezi endaweni yeshumi kwilogi, yona ibheke ukuvuka izithathe ngemuva kokuhlulwa ngo 1-0 yiMagesi emdlalweni wayo wokugcina.
Umqeqeshi uManqoba Mngqithi usanqobe owodwa kuphela emidlalweni yakhe emihlanu edlule.
Uzobe ebheke umgadli osemnkantshubomvu uKnox Mutizwa ukuthi ahole leli qembu uma lihlasela kulo mdlalo.
Womabili la maqembu azobe ehlose ukunqoba okuyinto ayidinga kakhulu kulo mdlalo othembisa ukudla ngokushuba.
