Ufikelwe ‘umbono’ uHanamub eshaya inguzunga yegoli
Ukaputeni waMaZulu FC, uRiaan Hanamub, uthi uvele wafikelwa umuzwa othile ngesikhathi eshaya igoli osekubhekwe ukuthi libe phakathi kwazoqokelwa igoli lenyanga.
Udedele inguzunga yeshodi esebenzisa ‘unyawo lokuhamba’ – olwesikudla – washaya igoli eliguqise omkhaya babo iGolden Arrows.
Unozinti weGolden Arrows uXolani Ngcobo unwebeke waphela ezama ukufica leli bhola, kodwa laze layokhalakathela enethini – lingena ekhoneni eliphezulu kwesokudla.
Leli goli libe ngelanele ukusiza AmaZulu avale unyaka ngokunqoba futhi aqoqe amaphuzu amathathu abalulekile awanyusele endaweni yesithathu kwilogi yeBetway Premiership.
URiaan Hanamub uqokwe njengomdlali ovelele kulo mdlalo, futhi ekhuluma ngemuva komdlalo, uthe ufikelwe nomuzwa ngesikhathi enquma ukudedela ishodi.
“Ngivele ngafikelwa umuzwa nje… Ngiyazi ukuthi ngisebenzisa kakhulu isinxele,” kusho lo mdlali waseNamibia.
“Ngiyazi ukuthi wonke umuntu wazi ukuthi ngimuhle kakhulu ngonyawo lwesinxele.
“Abalindele ukuthi ngikhahlele into ephilayo ngonyawo lwesikudla. Ngakho-ke, ngibonga kakhulu ngokuthi lingenile,” kwengeza uRiaan Hanamub.
Ukunqoba kuqinisekise ukuthi Usuthu luvala unyaka ngenothi eliphezulu, kwaphinde kwalungisa iphutha lokuhlulwa ngempelasonto edlule yiRichards Bay FC.
“Kumele sibonge kubaqeqeshi nakubadlali ngoba siziqeqeshe kanzima ezinsukwini ezimbalwa ezedlule njengoba besiphuma ekuhlulweni,” kusho uHanamub.
“Ukuzinikela kwethu kudlale indima enkulu kulo mdlalo. Ngibonga abaqeqeshi nabalandeli abaphume ngobuningi ukuzoseseka.”
FUNDA NALA | UMolangoane uveza okwenza iChiefs ithenge abadlali abahlulekayo
Ikhefu elide likaDisemba – eliphinde lihlanganise iCaf Africa Cup of Nations – lizonikeza AmaZulu ithuba lokucija amaqhinga awo nakakhulu.
ZITHOLE ZISHISA: Cofa lapha usithole kwiWhatsApp Channel yethu
