UNabi uthembisa ukuhlwaya umhlaba wonke efuna umgadli
- Sibongiseni GUMBI
UNasreddine Nabi uthi iKaizer Chiefs izobuyela emakethe ngewindi elilandelayo lokudayiselana ngabadlali.
Iwindi lizophinde livulwe ngoJanuwari, kanti iChiefs izosayinisa abadlali abaningi njengoba ibheke ukwakha isikwati esibanzi.
Amakhosi abhekene nenselelo enzima yokubuyela ekubeni yiqembu elilwela izicoco.
Phela manje sekuphele amasizini ayisishiyagalolunye engayazi indebe.
Isizini edlule ibe ngembi kakhulu njengoba iphele isendaweni ka-10 kwiligi.
Nokho izimpawu ziyathembisa ngabadlali abasayiniswe yiChiefs ngaphansi kukaNabi.
Abadlali abasha abafana noGaston Sirino, Bradley Cross, Ignacio Miguel noRushwin Dortley bonke bahlabe umxhwele.
“Ngicabanga ukuthi asikaqedi ukushintsha isikwati, lokhu kujwayelekile,” kusho uNabi.
“Kuzo zonke izinqumo, inhloso yami wukusiza iChiefs ibe ngcono. Akufanele kube nobungane, hhayi ukuba nozwelo.
“Mhlawumbe kumdlali ongekho ezingeni lethu kuzoba nelinye ithuba…
“Abantu bebephusha ukubona umgadli ngaphambi kwewindi lokugcina (elivaliwe), kodwa amathuba awavelanga.
“Ngo-Okthoba asidlali imidlalo eminingi, bese kuba noNovemba noDisemba…
“Ngemuva kwalokho (ngoJanuwari) kuzovulwa iwindi elisha, futhi sizoba nethuba lokubheka emhlabeni jikelele ukuze sithole abadlali abahamba phambili.”
Okwamanje, nokho, uNabi uzogxila ekuzameni ekuhlanganiseni iqembu lakhe lamanje ukuze athole umphumela kwiSundowns.
Amathikithi alo mdlalo kulindeleke ukuthi adayiswe wonke ngaphambi komdlalo. Selokhu kuqale isizini, iChiefs idlala ezinkundleni ezigcwele phama njengoba abalandeli bayo bevuselelekile ngokufika kukaNabi.
“Mhlawumbe abalandeli bafana nami, ngithembekile, nginothando olukhulu,” kwengeza uNabi.
“Mhlawumbe bayangazi ngiseseTanzania naseMorocco. Nginethuba elikhulu lokuqeqesha le kilabhu, nokufeza izinhloso zale kilabhu.”
Ukushaya iSundowns kungayifaka umfutho ngokwedlulele iChiefs, izibone ukuthi isingazama ukungena emjahweni wesicoco.
